Demostracionnan contra gobierno exigiendo renuncia di presidente Jovenel Moise a escala desde diabierna pasa na Haiti, unda na henter e pais activistanan a kima tire, a lanta baricada y a sakea wardanan di polis y negoshi, kimando varios di nan.
Agencia di auto, banco y tienda di electronica na Petionville a sufri di atake unda na varios lugar huma preto tabata sali. Periodistanan di radio a reporta hende den e demostracion arma cu machete mientras otronan tabata desarma polis na Les Cayes den sur di Haiti. Na Cité Soleil un bario margina di Port-au-Prince, demostrante nan a ataca y sakea un base di Polis Nacional, sacando tur mueble y cana bay cu nan, mientras a capta esaki riba video.
Cantando “Gara e ladron” y “Libertad o Morto” tabatin persona cu tabata carga tayo bashi pa simbolisa e promesa no cumpli di Moise pa percura pa cuminda. E protestantenan a baha den e ciudadnan mayor di e pais trahando baricada y kimando tire haciendo e camindanan practicamente intransitable. Segun e cu disturbionan tabata birando mas serio, panico a cuminsa surgi den casnan priva y den circulonan diplomatico.
Den e dianan prome cu e disturbionan a cuminsa, Moise a señala den un discurso graba di antemano cu e tabata considera laga candidatura bay di su ultimo escogencia pa prome ministro, Fritz William Michel, y a propone un gobierno di unidad. E efecto tabata net lo contrario; e protestanan a aumenta y a yama un biaha mas pa e baha.
