Den dos aña di tempo, presidente Jovenel Moise tabatin varios prome ministro. Jean Henry Ceant y Jacques Guy Lafontant no a resisti pa mucho tempo, ni por a resolve e temanan di gravedad cu e pais ta pasando aden.
Na maart e presidente a nombra su ministro di cultura y comunicacion, Jean-Michel Lapin, como prome ministro preliminar y dia 9 di april su nombramento a bira permanente. E speransa di hopi Haitiano ta cu su gobernacion por trece mas stabilidad y seguridad den e pais cu mas problema economico di e continente.
E antecesornan di Lapin no a sobrevivi pasobra nan no por a responde adecuadamente na e demostracionnan violento cu ta aparece regularmente, relaciona cu e crisis socio-economico cu e pais ta enfrentando, unda cierto medidanan no ta cay den bon tera, manera e aumento di e prijs di combustible a causa un erupcion di violencia aña pasa. E olanan aki di malcontento popular tabata hasta menasa di termina cu presidencia di Moise.
Tambe ta hunga un papel importante e scandal di corupcion den e programa conhunto cu Venezuela, PetroCaribe, den cual Haiti tabata ricibi productonan petrolero na prijs preferencial. Centenares di miyones a desaparece den e programa aki y tin difererencia di opinion den e top politico cuanto esfuerso ta haci pa investiga y enhuicia e culpablenan.
Mientras tanto, e incapacidad pa haya combustible di Venezuela a obliga Haiti busca solucion riba mercado internacional, pero no sin problema. Un proveedor Mericano, Novum, a nenga di entrega recientemente 150.000 bari di gasolin te ora gobierno di Haiti paga US$ 58 miyon na pago atrasa cu e compania. Haitianonan ta mira e situacion aki como maneho deficiente clasico, relaciona cu mal gobernacion.
