Presidente Haitiano, Jovenel Moise a anuncia ayera cu polis a aresta mas di 20 persona ken el a acusa di purba di mat’e y deroca su gobierno, incluyendo un hues di Corte Supremo kende tin sosten di lidernan di oposicion exigiendo retiro di Moise.
Moise a papia na aeropuerto di Haiti na Port-au-Prince, rondona pa e prome minister di e pais y e hefe di polis mientras e tabata prepara pa bay e pueblo costeño di Jacmel pa e ceremonia di apertura di su carnaval anual, cual ta tumando luga memey di e pandemia.
“Tabatin un intento riba mi bida”, el a bisa.
Moise a alega cu e conspiracion a cuminsa dia 20 di november pero no a duna mas detaye ni evidencia, excepto bisando cu entre esnan aresta tin un hues y un inspector general di polis. Moise a bisa cu otro oficialnan di alto rango lo duna mas informacion pero nan tur a cana bay y no a papia mas cu e reporteronan.
No por a tuma contacto inmediatamente cu lidernan di oposicion pa haya comentario.
E arestonan ta yega e dia cu lidernan di oposicion ta exigi renuncia di Moise, bisando cu su termino a caba ayera. Moise repetidamente a declara cu su termino di cinco aña ta termina na februari 2022. Termino di ex-presidente Michel Martelly a termina na 2016, pero un eleccion caotico a forsa e nombramento di un presidente provisional pa un aña te ora a huramenta Moise na 2017.
Oposicion a organisa protestanan recien exigiendo retiro di Moise, y e cayanan di Haiti normalmente congestiona a keda bashi ayera mientras un cantidad chikito di manifestante a kima taira.
Mientras tanto, ta parce cu Moise ta conta cu sosten di administracion di presidente Mericano, Joe Biden. Ned Price, un vocero di Departamento di Estado Mericano, diabierna ultimo a bisa cu Merca a urgi Haiti pa organisa eleccionnan liber y husto pa asina reanuda operacion di parlamento, agregando cu un presidente nobo mester sucede Moise na momento cu su termino caduca na 2022.
Actualmente Moise ta gobernando pa decreto despues di disolve un parlamento di mayoria na januari 2020 despues cu no a tene eleccionnan legislativo. E ta planeando un referendum constitucional pa april, cual criticonan ta bisa por dun’e mas poder, mientras eleccion general ta programa pa e aña aki.
