Presidente Haitiano Jovenel Moise a kibra silencio despues di un siman di disturbio y manifestacion exigiendo su renuncia.
Den un discurso desde palacio presidencial diahuebs, Moise a declara cu e no “ta bay entrega e pais na gruponan arma y narcotraficante,” referiendo na funcionarionan di gobierno cu a subi caya hunto cu e “hefenan di banda busca pa husticia.”
“Mi a scucha e voz di pueblo. Mi conoce e problemanan cu ta tormenta pueblo. Ta p’esey gobierno a tuma tanto medida,” el a bisa. “Mi a pidi prome ministro pa splica nan y aplica nan sin retraso pa alivia miseria.”
Desde dia 7 di februari, por lo menos shete hende a fayece mientras e pais a cay den un crisis politico, cu bida diario paralisa como resultado di protesta y baricada poni den e ciudadnan principal.
Departamento di estado Mericano diahuebs pasa a ordena saca tur personal no esencial y nan famia for di e pais, memey di e disturbionan continuando. Canada tambe a anuncia cu nan ta cera nan embahada na capital Port-au-Prince diahuebs pasa, pero a declara cu lo sigui monitorea e situacion den e dianan venidero.
E demostrantenan, rabia pa inflacion creciente y e supuesto robo di casi 2 biyon dollar di e fondo di ayudo Venezolano di petroleo na e isla, ta exigi renuncia di Moise.
