(HaitianTimes) – President Jovenel Moïse a ser asesina na su cas na Pélerin, Port-au-Prince awe marduga, asina anterior Prome Ministro Claude Joseph a skirbi den un declaracion.
Promer Dama Martine Moïse tambe a ser tira y a confirma su morto na hospital unda a trat’e pa su heridanan di bala, segun medionan Haitiano. Segun Joseph, no a identifica e atacantenan, cu tabata papia Spaño.
Haitianonan a lanta awemainta cu e noticia cu Moïse a ser asesina den marduga na su cas. Riba rednan social hopi di nan a expresa nan tristeza no solamente pa morto di e hefe di estado, pero tambe pa loke esaki ta significa pa e pais.
E asesinato a tuma lugar algun dia despues cu Moïse a nombra un promer ministro nobo y a otorga “décharge” financiero completo na anterior ministro y promer ministronan cu a sirbi e pais entre 7 di februari 1991 y 7 di februari 2017.
E decreto a bin despues di e nombramento di neurocirujano Ariel Henry como e ultimo promer ministro bao di Moïse. Como un anterior ministro di Interior, Henry lo tabata mester un “décharge” di parlamento.
Moïse tabata e di 58 presidente di Haiti y a yega na poder na februari 2017 meymey di eleccion controversial. Su presidencia a keda marca pa un serie di incidente incluyendo e scandal di fondonan di PetroCaribe y di bandanan arma cu ta terorisando e ciudadanonan pa varios luna.
Dia 7 di februari di e aña aki, Moïse a bisa cu varios invasor a purba di asesin’e den un golpi di estado fracasa. Moïse ta e tercer presidente asesina di Haiti. Haiti su promer hefe di estado Jean-Jacques Dessalines a ser mata na 1806 y Vilbrun Sam na 1915.
