(AP) — Hombernan arma a invadi otro pueblo nort di capital Haitiano ayera, tirando riba hende y pegando casnan na candela, apenas un siman despues cu un masacre a mata al menos 115 persona na e region central di e pais. E cantidad di fayecido no tabata conoci inmediatamente.
Residentenan na e pueblo Arcahaie den costa a haci un yamado na stacionnan di radio suplicando pa ayudo y pidiendo pa polis bin salba nan.
Lionel Lazarre, vocero interino di polis, a bisa Radio Caraibes cu agentenan tabata na e sitio y cu autoridadnan tabata tumando varios medida pa reforsa nan presencia. “Polis a scucha e pueblo di Arcahaie gritando pa ayudo,” el a bisa.
Radio Télé Monopole a reporta cu hombernan arma a ataca e pueblo prome cu salida di solo, tirando y heridando varios persona mientras nan a pega casnan na candela, specialmente esnan den comunidadnan Vinger y Bercy.
Varios stacion di radio a reporta cu e atake a keda lansa pa e gang den e area di Canaan conoci como e Taliban. E gang tin alrededor di 200 miembro y ta opera principalmente den parti nort di capital Port-au-Prince.
Arcahaie ta ubica entre capital Haitiano y e pueblo central Pont-Sonde, unda otro gang, Gran Grif ta acusa di a mata mas cu 115 persona diahuebs di siman pasa.
Mientras mayoria di violencia di gang ta centra na Port-au-Prince – di cual 80 porciento ta controla pa gang – el a plama nort di e capital den añanan recien, specialmente region central di Artibonite.
