(HaitiNews/YahooNews) – Segun expertonan, manda un forza internacional pa Haiti por duna alivio na e poblacion casi strangula pa gangnan poderoso, pero cualkier mision nobo di stabilizacion tin poco probabilidad di termina e caos, sin un solucion politico a largo plazo.
Desde mitar di september e gangnan a bloquea acceso na e terminal importante di petroleo, paralizando un nacion cu tabata sinti caba escasez di combustible pa opera tareanan critico manera distribucion di awa potable y energia pa facilidadnan medico.
Promer ministro Ariel Henry a haci un yamado na comunidad internacional pa interveni den e situacion na su pais. Secretario general Antonio Guterres di Nacionnan Uni a responde na e yamado, y a puntra Conseho di Seguridad di ONU pa considera manda un mision internacional arma pa pone un fin na loke el a yama un “situacion di pesadiya” den e pais mas pober di America.
Pero e idea di un forza stranhero nobo no ta haya apoyo unanime den poblacion Haitiano, y tampoco den Conseho di Seguridad. “Na un momento unda gobierno di Haiti ta incapaz pa goberna, manda un forza di accion rapido asina pa Haiti lo ricibi comprension, apoyo y cooperacion di e partidonan na Haiti, o lo e topa cu resistencia o hasta genera confrontacion violento?” tabata pregunta di representante permanente di China na ONU, Geng Shuang.
Haiti a haya den pasado intervencion di tropanan Mericano, Frances y Canades, hunto cu mision di stabilizacion internacional di Nacionnan Uni. E ultimo cuerpo pacificador a bandona Haiti na 2017, y despues no tabatin stabilidad politico. Sin embargo, tin opinion cu manda tropa por yuda, a corto plazo, tumando control di e sistema di distribucion di petroleo y recupera produccion di awa potable, e clave pa combati e epidemia di colera.
