(ElNuevoDia/AP) – E investigacion en torno di e e asesinato di presidente Jovenel Moise di Haiti, a resulta te awor den e aresto di 23 persona y tres persona mata den combate cu forzanan di seguridad estatal. Sin embargo no otin ningun claridad encuanto e posible autor(nan) intelectual.
A identifica un sospechoso principal entre e supuesto mercenarionan Colombiano, pero te awor no tin pista di esnan cu interes politico o economico na Haiti mes cu por a ordena e asesinato.
Remarcable ta cu e ‘primera dama; di Haiti a resulta herida den e asalto y a keda traslada pa un hospital na Florida, y te awor no a duna ningun pista den su declaracionnan. El a limita su mes na acusa :mercenario” di a caba cu bida di su esposo, pero no a nombra ningun posible sospechoso.
Claude Joseph ta e actual promer ministro interino di Haiti cu tabata na punto di perde su puesto na momento di e asesinato. Joseph a ser nombra den e puesto na april di e aña aki pa Moise, pero dos dia promer cu e asesinato, di repente Moise a anuncia nombramento di e medico Ariel Henry como proximo ministro presidente, pero no a yega na huramenta despues di morto di Moise.
Despues di e sucedido, Joseph a anuncia cu e lo keda como promer ministro interino y a declara un “estado di sitio” na e pais, similar na un ley marcial. Henry a declara cu e mester ta promer ministro, ya cu esey ta loke tabata deseo di Moise.
Merca a reconoce Joseph como promer ministro interino, pero un delegacion di funcionario Mericano a reuni cu Henry tambe y cu senador Joseph Lambert, ken ta presidi e Senado desmantela. E mandato di e Senado a vence sin cu tabatin eleccion nobo. Lambert tambe ta aspira puesto di promer ministro interino.
