Segun e organisacion Human Rights Watch, den un comunicado riba nan website hrw.org, autoridadnan Haitiano lo mester investiga pronto y profundamente e casonan di morto y herido den e ultimo disturbionan cu a tuma luga te cu luna di februari.
Na februari a muri 34 persona y 102 a keda herida, incluyendo 23 agente policial, durante e manifestacionnan, segun Mision di Nacionnan Uni pa Apoyo na Husticia na Haiti.
Segun Jose Miguel Vivanco, director pa America na Human Rights Watch, autoridadnan Haitiano mester investiga specificamente uzo excesivo di forsa di polis durante e manifestacionnan y sigura cu cada polis responsabel pa uzo excesivo di violencia keda procesa hudicialmente.
Miles di Haitiano a subi caya na october y november aña pasa, pa protesta contra medidanan di austeridad di gobierno, mientras e revelacion cu biyones di dollar a desaparece for di e fondo di subsidio conhunto cu Venezuela, PetroCaribe, a causa un ola di protesta cu a continua den e prome lunanan di e aña aki. Mientras presion tabata continua riba presidente Jovenel Moise pa renuncia, siman pasa parlamento Haitiano a pasa mocion di desconfiansa contra prome ministro Ceant, causando otro crisis mas den e pais mas pober di e hemisferio.
Gobierno a anuncia na januari cu lo tin accion legal y penal contra esunnan cu a comete crimen den e scandal di PetroCaribe, aunke no a divulga informacion tocante e proceso hudicial aki.
