Manifestantenan anti-gobierno a lanta baricada den varios caya importante di capital Port-au-Prince ayera, un dia despues cu un protesta di polis pa mihor condicion di trabao a termina den un tiroteo cu militarnan na sede principal di ehercito.
Gobierno di presidente Jovenel Moïse a yama e atake ‘un intento di golpe di estado’ y ehercito a papia di un ‘situacion di guera’. Por lo menos dos persona a fayece den e disturbionan diadomingo, despues cu autoridadnan a cancela celebracion di carnaval.
Dialuna manifestantenan a tira piedra, kima tire y a bolter garoshinan di ice-cream riba e cayanan cu ta conduci na vivienda di presidente Moïse, di ken nan ta exigi su renuncia.
Partinan grandi di e ciudad tabata bandona un dia despues cu polisnan a ataca e cuartel general di ehercito y a habr candela. Algun di nan tabata bisti di uniform policial.
General Jodel Lesage di forsanan arma Haitiano a bis amedionan local: “Nos ta bao atake di arma di candela di tur tipo, rifle automatico, bom di gasolin, gas lacrimogeno.” Gobierno a bisa cu esaki tabata ‘un atake riba libertad y democracia’. Polis ta bisa cu nan a ser ataca prome. Nan tabata den protesta pa varios siman caba. Un di nan exigencianan clave ta pa por forma un sindicato, cu por trece mas transparencia den e negociacion cu gobierno. Tambe nan ta desea mihor salario.
Presidente Moïse a anuncia siman pasa creacion di un fondo financiero pa famia di polis cu a fayece cumpliendo nan deber, pero e gesto no a logra calma e polisnan rabia.
