Un estudio publica diamars ultimo na The Conversation, un website academico cu ta conta cu financiamento di varios universidad, elabora pa dos profesor universitario Britanico, ta resultado di entrevista cu 2.500 hende muhe Haitiano cu tabata biba cerca di e base di ONU na 2017, ultimo aña di e mision cu a cuminsa na 2004. E pregunta tabata: Con ta experiencia di un hende muhe of un mucha muhe cu ta biba den un comunidad cu ta acoge un mision di paz?
Pa nan mesun boluntad y sin puntra nada, 265 a papia tocante situacionnan den cual miembronan di helm blauw a abusa y embarasa hende muhe y mucha muhe local for di 11 aña di edad.
Esunnan cu a comete e crimen tabata di 13 pais distinto. Pero e mayoria di nan tabata Brasileño of Uruguayo, segun e documento. Den mayoria di casonan, ora a adverti riba e existencia di e casonan aki, ONU, en bes di tuma medidanan disciplinario, tabata manda e homber pa su pais di origen bek.
E estudio a recorda varios reporte di medionan nacional y internacional riba casonan distinto ora e helm blauw, tanto na Haiti como otro paisnan unda a keda destina, a ofrece cuminda y sumanan chikito di placa a cambio di sex cu muchanan menor di edad.
Den un comunicado, ONU a indica cu nan tabata tuma na serio e cuestion plantia pa e rapport y cu combati e abusonan y explotacion sexual di parti di forsanan tabata e principal prioridad pa e Secretario General, Antonio Guterres. “Desafortunadamente nos a wak casonan cu tabatin vinculo cu helm blauw durante añanan ultimo, aunke e cantidad di acusacionnan a reduci desde 2013”, e organismo a declara.
