(AP) — Un enfermera y su yiu muhe hoben kende a bira victima di secuestro na Haiti fin di juli y a keda den libertad e siman aki a sali ileso y ta saludable, segun un organisacion di ayudo a bisa e siman aki.
E anuncio a alivia preocupacion pa e condicion di Alix Dorsainvil y su yiu muhe. Gangnan violento na Haiti ta conoci pa maltrata y hasta tin biaha viola esnan cu nan ta secuestra, hopi biaha deteniendo e victimanan pa lunas y exigiendo placa pa rescate varios biaha.
“Alix ta un muhe remarcablemente resiliente, ken su caminda cu Dios ta guia su amor profundo pa su famia y su compromiso apasionado pa pueblo Haitiano,” segun El Roi Haiti, e grupo Cristian funda pa esposo di Dorsainvil. Tambe a gradici autoridadnan Mericano pa traha “incansablemente tras di escena” y a duna credito na ministerio global di seguridad basa riba fe pa duna acceso na consultant cu a yuda conduci na e liberacion di Dorsainvil y su yiu muhe dia 8 di augustus.
No ta cla si a paga un rescate. E grupo y oficialnan Mericano no a duna mas detaye, y polis nacional Haitiano no a responde na solicitudnan pa comentario.
Pierre Esperance, director ehecutivo di National Human Rights Defense Network na Haiti, a bisa den un entrevista via telefon cu e rescatenan ta varia hopi, cu algun gang exigiendo hasta un miyon dollar y otronan pidiendo $100mil pero aceptando $10mil. Tambe el a nota cu e gangnan tin biaha ta exigi un di dos of di tres rescate prome cu libera un persona. “E gangnan ta terorista,” el a bisa, expresando e sintimento di hopi na den e pais di mas di 11 miyon persona, unda mas cu 530 persona a bira victima di secuestro desde januari, segun un organisacion local.
Prome minister Haitiano, Ariel Henry a reitera so solicitud cu el a haci pa prome biaha na october pa lansamento di un forsa arma internacional pa combati gang cu ta calcula ta controla hasta 80 porciento di capital Haitiano, Port-au-Prince.
Kenya a ofrece la lidera un forsa policial multinacional, y Merca a bisa siman pasa cu lo propone un resolucion den Conseho di Seguridad di ONU pa autorisa e accion.
