Manifestantenan di oposicion a bolbe riba caya pa protesta na Port-au-Prince, capital di Haiti, mientras gobierno a declara cu ta bay profundisa e investigacion encuanto e casonan di corupcion denuncia y cu ta bay implementa medida economico. Demostrantenan a kima tire y a pone baricada den caya diadomingo pasa. Por lo menos 7 persona a perde nan bida na e pais desde cu e protestanan a cuminsa mas tempran e luna aki.
E manifestantenan ta rabia pa inflacion galopante y ta exigi un investigacion independiente di alegacionnan cu funcionario y ministronan anterior a malversa fondonan di desaroyo di un programa di apoyo acorda entre Haiti y Venezuela, basa riba compra di petroleo na prijs preferencial, e programa PetroCaribe.
Segun e denuncianan lo ta trata di un robo di US$2 biyon, di acuerdo cu un informe di corte. E manifestantenan a exigi renuncia di presidente Jovenel Moise, na poder desde 2017, acusa tambe di envolvimento den e iregularidadnan. Pero siman pasa el a nenga di duna oido na e exigencianan pa baha, bisando cu e no ta laga e pais “na man di gang arma y narcotraficante.” 
Diasabra pasa prome ministro Jean-Henry Céant a anuncia medida incluyendo un reduccion di 30% di gasto di gobierno y e abolicion di privilegio, manera beneficio pa combustibel, telefon y biahe den exterior pa funcionario di gobierno. El a declara tambe cu lo sigui cu e investigacion encuanto e fondonan di PetroCaribe.
Haiti ta e pais mas pober di continente Americano y 60% di e poblacion ta biba di menos cu dos dollar pa dia, segun cifra di Banco Mundial.
