Despues di tres intento pa logra haya un Prome Ministro cu ta keda, Presidente Jovenel Moïse a scoge un funcionario no conoci di Ministerio di Economia y Finanzas y anterior Hefe di Gabinete pa bira su proximo Prome Ministro.
Moïse recientemente a nomina Fritz William Michel, un funcionario publico poco conoci, pa dirigi gobierno y represente na presidente di Senado y di Camara di Diputado. Michel lo reemplasa Jean Michel Lapin cu, for di su nominacion na april, nunca a haya e oportunidad di presenta su politica en general, o logra haya esaki ratifica pa Parlamento, pa via di varios boycott di e sesionnan di ratificacion di un grupo di Senador. Lapin no por a demostra cu e tabatin un bon gara riba realidad socioeconomico di e pais, e desafionan di siguridad y e asunto di violencia di bandanan.
Moïse tabatin un problema pa mantene su Prome Ministronan. E prome, Jacques Guy Lafontant, a keda sacrifica un aña pasa, na juli 2018, despues di un serie di protesta violento cu a cuminsa a causa di un crisis socioeconomico cu tabata birando mas grave.
Presidente Moïse despues a trece aden Jean-Henry Céant, cu no a wanta mas cu seis luna como Prome Ministro. Céant a anuncia medida pa enfrenta e crisis, specialmente despues di e protestanan na februari 2019, pero prome cu a yega asina leu, su mal comunicacion cu e presidente a conduci na su caida na maart.
Awor, Moïse ta obliga di laga Lapin bay, pero e pregunta ta si el a haya un miho colaborado na su luga. Ademas, oposicion ta contra Moïse mes tambe. Probablemente protesta lo continua te ora e mes renuncia.
