(MiamiHerald/AP) – Pa gran parti di e crisis di Covid-19 desde maart 2020, Haiti a mustra bastante stabiel cu poco contagio, pero e imagen ey ta cambiando rapidamente. Te recientemente Haiti tabatin hopi menos contagio cu nan bisiña Republica Dominicana, cu economicamente y pa loke ta infrastructura ta mihor equipa cu e pais mas pober di e continente.
Awor, sin embargo, tin pacient cu ta muri den ambulance despues cu nan no por a haya un hospital pa tuma nan. Un di e poco hospitalnan cu ta tuma pacient di Covid ainda a anuncia cu nan no ta acepra pacient di Covid mas te proximo aviso.
E aumento fuerte den caso y morto di Covid-19 na e pais no ta pone solamente presion riba e sistema di salud fragil, sino cu el a conduci tambe na pedido di mas ayudo internacional, segun oficina Americano (PAHO) di World Health organization (WHO).
Segun dr. Carissa Etienne, director di PAHO, tin un necesidad creciente di recurso di comunidad internacional pa expande urgentemente e ayudo pa caso serio di Covid-19 na Haiti. Esey ta inclui prepara espacionan nobo pa por maneha pacient, y tambe percura pa tur material necesario, manera equipo y oxigeno.
Despues di mas di un aña di reporta presencia di e virus, actualmente Haiti ta experimenta un ola mortal di contagio despues di detecta presencia di dos variante altamente contagioso, esun Britanico y di Brasil. Keto bay sin acceso na vacuna, Haitianonan a cuminza drenta den panico segun cu hospitalizacion a aumenta, prijs di oxigeno a bay te den nubia y e virus a mata diferente personalidad conoci di politica y gobernacion.
“Si e contagio no baha velocidad, e sistema Haitiano di salud publico, specialmente e centronan di atencion pa Covid, lo bay crash,: asina dr. Marc Augustin, director medico di St Luke hospital na Port-au-Prince, a bisa.
Top of Form
