Conseho di Siguridad di Nacionnan Uni a aproba un resolucion estableciendo un mision politico na Haiti entrante 16 di october venidero cu lo reemplasa oficialmente e actividadnan di mantene paz na e pais mas pober di hemisferio occidental.
E votacion riba e proyecto di resolucion di Estadonan Uni tabata 13-0, cu abstencion di bisiña Republica Dominicana y China. E accion aki di e Conseho a sigui despues di un voto unanime dia 12 di april pa termina mantenemento di paz dia 15 di october proximo.
E mantenedornan di paz di Nacionnan Uni a sali di e pais dia 15 di october 2017, despues di 13 aña, pero a keda un mision di stabilisacion atras pa train polis nacional, yuda gobierno fortifica institucionnan legal y hudicial,y monitor derecho humano.
E resolucion ta autorisa e mision politico pa conseha gobierno den “promove y fortifica stabilidad politico y bon gobernacion,” incluyendo promove orden legal, apoyando un dialogo nacional inclusivo y proteha y promove derecho humano.
Embahador interino di Merca Jonathan Cohen a yama adopcion di e resolucion “un momento historico” bisando cu e transicion di un mision di mantene paz pa un mision politico ta demostra “cu segun condicion na e pais ta cambiando e presencia di Nacionnan Uni mester por y mester cambia pa refleha e realidad nobo.”
Un transicion exitoso segun Cohen lo depende grandemente di gobierno di Haiti asumiendo su responsabilidad pa un serie di asunto incluyendo profesionalisacion di polis nacional, reduci violencia di gang y den comunidad, protehando derecho humano, mehorando facilidadnan di prizon y reforma e sistema hudicial.
