Dia 31 di mei recien pasa, Contraloria General di Haiti a emiti un rapport di mas di 600 pagina encuanto e mal maneho di e fondonan di PetroCaribe.
E scandal di corupcion cu ta rondona PetroCaribe, e programa regional di Venezuela pa crea amistad cu gobiernonan cu ta haya producto petrolero di e pais aki na prijs preferencial, a bira e mero curason di e protestanan di ultimo tempo y cu a escala atrobe fin di siman pasa. Y e actual presidente tambe ta vincula cu e scandal aki, aunke e programa no a inicia bao su mandato. Sin embargo, e protestanan actual por significa e caida definitivo di e presidente, awor cu a resulta cu e tambe ta relaciona cu e corupcion.
E presidente Haitiano ta vincula cu PetroCaribe via su propio compania, Agritras, y a surgi nomber di un mas, Betexs, ambos lo a beneficia di contrato lucrativo bao di e programa.
E rapport ta parce di a habri un caha di Pandora cu ta treciendo na luz di dia e nivel di corupcion den cual Moise y su partido Tèt Kale tabata envolvi.
E rapport ta enfoca riba partido Tèt Kale como esun cu a horta mas di PetroCaribe. Gobierno di Moise ta haya e golpinan, pero e gobiernonan anterior tambe ta carga culpa. E programa di PetroCaribe a inicia na 2006 bao di presidente Rene Preval. Control a bay pa partido Tèt Kale tempo cu Joseph Michel Martelly a asumi presidencia na 2010, pasando e batuta pa Jocelerme Privert, cu a actua como presidente interino entre februari 2016 y februari 2017.
