Haime Croes: ‘Pueblo kier regulacion y cumplimento tambe’

DIP (Directie Infrastructuur en Planning) a tene su reunion na diferente bario, pa asina splica tocante e siguiente proceso despues di ROP, cu ta ROPV, e preparatorio di desaroyo teritorial cu reglamentacion.

Haime Croes, director di DIP a bisa cu for di prome october e ROPV ta disponibel pa comunidad por tuma nota riba dje. E stap di ROPV ta bin despues cu e cumpli cu ley di ROP, awo mester traha riba ROPV.

“Nos a mira e trayecto di ROP cual ta e maneho cu gobierno ta stipula pa e proximo 10 aña. Manera boso sa, nos ROP 2009 – 2019 a yega su fin. Pa e parti di ROP, ministerio di infrastructura, nos ta bay na un pais cu vision y desaroyo duradero”, Croes ta splica.

E ta bisa cu e desaroyo duradero pa Aruba ta locual ta trata e aspecto di espacio, unda ta bay tene cuenta na e parti di naturalesa. ROP cu pasa e proceso democratico cu ley a bin dilanti ‘a yega su fin dia 17 juli 2019’.

Awo cu a cumpli cu un fase, mester bay na e siguiente fase cu ta ‘link e ROPV hunto cu ROP’. Sinembargo, e ta un maneho y no ta mara na un ley. E ta bisa cu minister a tuma consideracion con e ta bay, pero ‘no ta marabel’. “Awo nos ta bay pa e fase cu nos ta bay operacionalisa e areanan pa ROP. Den un mapa tin varios area di ROP, cu ta parti den color, manera centrum gebied, economisch gebied, landelijk gebied, asina tin diferente aspecto den ROP.” Croes ta splica cu cada un di nan tin ROPV cu tin nan regulacion.

Nan ta bay defini como cual ta area di naturalesa, y ta protegi. Nan lo destina e area aki, regulando kico por haci ariba e area, ki tipo di actividad y ki permiso mester pa haci algo eyden. Tur esey ta pone den e ROPV, e aspecto di regulacion.

Croes a comparti tocante e ‘townhall meetings’– reunionnan cu tabatin na bario. El a bisa cu e motibo pa tene esakinan tabata cu hende tabata critico y cu aspecto cu mas a resalta cu ROPV ta cu tin regulacion, pero kier aplicacion di esaki tambe.

E ta bisa cu hopi problema cu hende a trece dilanti ta e parti di traha supermercado, y construccion di apartamento cerca di otro cas. Anto esey ta causa molester den privacidad di otro hende cu ta biba cerca. Tambe por ehempel cas cu tin tres piso caminda tin permiso pa un so.

Segun Croes, tur esey ta forma parti di e ROPV. Ora cu esaki pasa y keda regla, ta bay haya sa cu ROP tin un balor unda tur hende cu ta biba lo evita actividad cu por trece conflicto. E calidad di bida ta bira grandi y asina hende por sa cu no por construi con cu nan kier den un teritorio unda cu no ta permiti.

“Asina tin diferente aspecto cu ta hinca den otro. Locual pueblo ta pidi ta control. Tabatin diferente caso, por ehempel cu persona a lanta un car rental na su cas, y tabata basha azeta den teritorio aki. Den e ROPV lo mustra cua bario habita y kico no mag di haci.”

Croes ta splica cu diferencia entre ROP y ROPV ta cu e ta marabel, unda cu hende por bay corte si no ta di acuerdo. DIP ta ocupa cu instrumento y unabes ROPV keda cla, esaki ta regula e desaroyo pa proteha pueblo y nos teritorio.

E ta bisa cu hunto lo bay controla e desaroyo di fase, tur hende por haya di DIP algun idea pa nan mira kico ROPV ta encera, por bay den e diferente MFA, den nan biblioteca, pa haya kico ROPV tin den dje.

Despues di un luna cu nan tin pa entrega keho y idea por escrito, nan ta haci un townhall meeting caminda ta raporta kico ta acuerdo y kico kier mas. Pa dia 1 di december ta entrega, pa evalua tur esaki y mira kico por cambia. Despues e ta bay Conseho di Minister, Raad van Advies y Staten. Ta calcula cu te juni of juli pa ROPV drenta na vigor.

Den e ROPV tin moratorio. E ta bisa cu no ta acepta mas cantidad di supermarket y esey ta controla. E permiso di construccion ta bou ROPV, pues mester tene nan mes na e reglanan.

E ta conta tambe pa cas, negoshi, cualkier situacion, si controla ROPV ta para den esaki kico ta posibel den area residencial. Ta importante pa no tin conflicto den bario y no trece peligro. “Si tur cos wordo regla den ROPV, por cana leu pa nos por caba di regla henter cos.”