Hailey Arendsz ta un hoben di 17 aña di edad ken recientemente a representa Aruba den e Beach Tennis Pan American Championship cu a tuma luga na Aruba. Den un entrevista cu Bon Dia Aruba Hailey ta conta con el a cuminsa practica e deporte di beach tennis y kico ta su meta pa futuro.
Hailey ta bishitando Universidad di Aruba y ta den su prome aña di FEF (Financieel Economische Faculteit). El a cuminsa su trayecto den e deporte di beach tennis na aña 2016/2017 ora e tabatin 8 aña y desde e tempo ey e ta activo den e deporte.
El a conta cu loke a inspirele pa cuminsa hunga beach tennis tabata un dia cu el a bay wak un competencia di beach tennis na Bushiri Beach. El a sinta wak e hungadonan cu tabata hungando riba e center court y for di e momento ey semper el a desea pa un dia e mes por hunga riba e center court.
Esaki no ta prome biaha cu Hailey ta representa Aruba den un Beach Tennis Pan American Championship. Ora e tabata chikito el a yega di hunga caba pa representa Aruba, pero despues cu e campeonato a bay afo e no tabatin chens di bay afo pa hunga. E aña aki cu e campeonato a regresa Aruba, hunto cu su partner el a prepara pa participa y duna e miho di nan banda pa laga Aruba su nomber na halto.
Beach tennis ta su pasion y un di e cosnan cu Hailey gusta mas di beach tennis ta cu e por hunga y lubida di tur cos. “Loke mas mi gusta di beach tennis ta e libertad y cu mi no mester pensa riba otro cosnan. E ta mi escape pafo di scol, di tur otro cos. Mi por bin hunga y pasa pret,” el a resalta.
Pa loke ta e trainingnan pa e campeonato, el a conta cu e trainingnan a bay hopi bon. Desde cu nan, Hailey y su partner di beach tennis, a haya sa cu e campeonato ta bay ta back na Aruba nan a cuminsa prepara.
“Nos a cuminsa un programa caminda nos ta train dos of mas biaha pa siman. Tabatin hende di afo cu a bin train nos, y ademas tur oportunidad cu mi tabata haya despues di scol mi ta bay train cu hende cu mi conoce,” el a indica.
Pa loke ta su meta pa futuro y unda e ta desea di yega den su carera como hungado di beach tennis, Hailey a expresa cu su deseo ta pa bira profesional y hunga rond mundo. “Si mi lo kier yega na un nivel profesional. Mi lo desea, si ta posibel, bay rond mundo, biaha y hunga beach tennis na Italia, na Brasil y diferente otro luga rond mundo,” el a bisa.
Por ultimo, Hailey a duna un mensahe specialmente na tur hoben di Aruba cu ta desea di practica un sport of hobby pero no tin e durf pa haci’e: “Ami ta haya nan mester djis purba, haci kico nan gusta. No tur ora sport ta pa un persona, pero deporte ta leuk mi semper a gusta haci deporte di chikito. Si bo gusta haci deporte haci’e, scol no ta bay stroba bo. Bo semper ta bay tin tempo pa haci’e si bo plania bon.”
Potretnan: Beach Tennis Aruba
