Actor di ‘Game of Thrones’, Hafthor Bjornsson a kibra un record mundial di deadlift, hisando 501kg (1,104 libra).
Bjornsson, kende a interpreta Ser Gregor ‘The Mountain’ Clegane den e serie di HBO, a kibra e record na su gym na su pais natal Iceland. E atleta a hisa e barbell pa dos seconde, prome cu laga e pesa cay y grita di alegria. Canal ESPN a stream e evento, y tambe a ser filma pa canal di YouTube di Bjornsson.
Bjornsson, kende ta midi 2.05 meter di haltura, anteriormente a gana e competencia di Homber mas Fuerte di Mundo na 2018. Papiando den video ‘tras di escena’ riba YouTube, Bjornsson a bisa: “Mi ta extremadamente orguyoso, bo sa. Mi ta extremadamente contento.”
“Ta tremendo – no tin nada miho cu demostra hende cu nan tabata fout. Tanto hende no a kere den mi, tanto hende a bisa ‘501kg nunca ta bay aumenta’… Pero tambe mi tabatin hopi sosten.” El a agrega: “Mi ta sinti saludabel, mi ta sinti bon. Mi ta djis simplemente sin palabra, maske mi ta papiando hopi aworaki. Pero mi ta emociona, super emociona – esaki ta enorme pa mi.”
Anteriormente, e record tabata di Eddie Hall, un homber Britanico kende na 2016 a converti den e prome homber pa hisa 500kg.
