Hackernan a usa lenguahe racista y imagen anti-semitico pa interumpi un reunion online di empleadonan di Wake Forest University, segun presidente di e universidad.
Den un mensahe riba website di e universidad, Nathan Hatch a bisa cu alrededor di 500 miembro di personal di Wake Forest tabata den un yamada via Zoom diaranson, na momento cu hackernan no identifica a interumpi esaki, segun Winston-Salem Journal a reporta ayera.
Personal di tecnologia di informacion (IT) di e universidad ta purbando di haya e origen di e atake, Hatch a bisa, agregando cu ta parce cu e hackernan a haya acceso na e reunion via un link cu a post publicamente online cu tambe tabata contene e password pa e reunion.
“Esaki tabata un experiencia traumatico pa hopi den e yamada, specialmente nos coleganan color scur, y ta reforsa cu nos tur tin un rol pa desempeña pa protege otro y nos comunidad di esunnan cu kier forsa nan odio riba nos”, Hatch a skirbi.
September ultimo, un cantidad di profesor y miembronan di personal di Wake Forest a ricibi e-mailnan racista, homofobico y anti-semita cu a pidi pa elimina minorianan etnico y studiantenan LGBT. Empleadonan di scol cu a ricibi e imagennan tabata traha den departamentonan di estudionan di genero y sociologia di e universidad, y den oficina y centronan cu ta traha riba asuntonan di diversidad.
