Ayera mainta lider di partido MEP y Formador di siguiente gobierno Evelyn Wever-Croes a reuni cu gobernador riba e formacion y avancenan den e proceso. Pa dia 27 di october nos lo tin un parlamento nobo y tur esfuersonan ta dirigi pa e mesun dia aki tin un gobierno nobo tambe segun sra. Wever-Croes a declara na prensa ayera mainta.
Evelyn: “Esaki ta un proceso serio, no ansha, no pura. Mes momento cu nos ta pone presion pa keda cla, nos ta tumando nos tempo si pa e bay bon.” Siman pasa cu sra. Wever-Croes a ricibi e instruccion di gobernador di Aruba pa formacion di siguiente gobierno, a keda palabra cu un biaha pa siman lo duna un briefing.
Ayera pues a toca e dia pa duna e prome briefing na gobernador riba con ta bayendo cu esfuersonan di formacion. MEP, POR cu RED a firma nan prome acuerdo di formacion diamars ultimo cual nan a presenta na gobernador. Awor nan ta den e fase di programa cual ta spera di keda cla cu ne den curso di e fin di siman aki mes. E reunionnan andando ta hopi intensivo segun sra. Wever-Croes. E siman aki nan a haya nan mes den reunionnan te oranan laat di anochi. Tin reunionnan por ehempel di tur partidonan hunto of bilateral manera MEP cu POR of MEP cu RED. Tin diferente tipo di reunion andando dependiendo na e puntonan cu mester keda trata. “E ambiente di e encuentronan ta bon. E no ta facil si pasobra algun di e hendenan aki ta conoce y combersando cu otro pa prome biaha. E forma cu nos tur ta acerca esaki ta profesional. Mester corda cu no ta nos a pidi esaki ta pueblo a pidi e cual ta trece cu ne un responsabilidad.”
Atendiendo diferencianan di programa
“E proceso ta tuma su tempo pasobra akinan bo ta poniendo e tres programanan banda di otro anto bo ta compara nan pa wak kico bo ta bay cu ne, kico no y kico bo ta bay purba di discuti con lo atende cu ne,” sra. Wever-Croes a declara na prensa ayera. E ta bisa cu logicamente tin diferencianan den programanan di partido y ta hopi importante pa atende cu tur punto awor prome cu yega na cualkier gobierno. Mester atende cu esakinan awo pasobra manera cu un gobierno nobo keda forma, tin hopi trabao pa haci y lo bira mas dificil pa atende puntonan cu por te hasta escala y bira problema. Manera cu keda cla cu e fase aki cu tabata programa entre ayera cu awe mes, lo bay pa reparticion di carteranan y apuntamento di cartera. Una bes cu tin e reparticion cla, e partidonan ta bay bek den nan seno pa bin cu proposicion di candidato pa minister. Lo pasa e ora na e procedura di screening manera cu e ley ta exigi pa e ora keda cla.
Puntonan di gobernacion
Basa riba acuerdo di formacion cu nan a firma, tin tres punto importante di discusion segun e Formador. E prome ta bon gobernacion y integridad cual ta un tema cu pa prome biaha ta haya un enfasis asina halto mirando e situacion na Aruba tambe. E di dos punto ta finansas publico. E Formador a declara di a reuni cu varios instancia algun cu informacion hopi delicado. “Den un reunion cu director di finansas mi a haya hopi mas informacion awor cu mi tin un miho bista con nos ta para financieramente. Y puntonan cu mi mester sigui discuti cu otro institutonan financiero.” E di tres punto ta cu ora bo pone e ser humano central, kico ta locual bo tin cu haci pa cumpli cu esey. Pues akinan ta encera calidad di enseñansa, siguridad di e comunidad, calidad di cuido di salud, pa e grandinan ta bon cuida, mas vivienda y atencion na medio ambiente. E tres puntonan aki ta trahando riba nan awo pa duna nan mas contenido segun e Formador.
‘Tur partido mester tin nan vision refleha den cada ministerio’
Na final por bin resulta cu tur e trabaonan aki ta por nada pasobra toch no ta yega na otro riba e punto ey. “Semper cosnan por pasa, sin embargo, na principio nos a palabra cu e puntonan di gobernacion anto despues bay pa e hendenan. Esey ta importante pasobra nos di MEP a bay campaña cu un programa cu por atende cu tur problema cu tin na Aruba. Nos tin solucion pa tur y den nos team nos tin suficiente hende ekipa pa cua tereno cu ta.
Pero nos tin cu biba cu e realidad cu nos so no ta goberna, e ta un coalicion,” sra. Wever-Croes ta splica. Kiermen ta bay tin cartera cu MEP no lo tin minister pe y si ta un so mes por ehempel salubridad, lo desea si pa inclui e vision di e programa di MEP. “P’esey ta asina importante pa traha y yega na palabracionnan di e programa na kico ta e puntonan mas principal. Anto despues ta bay wak ken ta ehecut’e. Esey ta trece pa mi mas stabilidad den un coalicion pasobra di adelanta bo a palabra esaki. Cada ken (partido) mester tin su maneho refleha den cada ministerio.”
Efecto di ‘islanan di gobernacion’
Sra. Wever-Croes ta bisa cu un punto crucial tambe ta cu hasta gobiernonan cu tabata nan so na mando tabata mira e ‘efecto di islanan.’ Ta purba di yega na e palabracionnan di awor aki mes pa purba mira kico kier logra di cuater aña. Si kier por ehempel legalisa uzo di Cannabis medicinal, e ta bay den man di un partido cu por ta no tabata tin e number un den su cartera, mester tin un plan pa wak con ta yega na acuerdonan. Tambe palabracionnan na con ta bay traha y consulta cu otro den general.
Tambe ta concentrando riba e parti di cuanto consehero y staff di cada minister mester ta. Esey ta palabracionnan cu nan ta haciendo di adelanta pa wak con tur esaki lo bay ta hinca den otro pa no bin problema despues. Ban bisa cu bin na palabracion cu un ministerio por haya solamente 15 empleado so, e ta bay keda asina. Kiermen si un dia un minister tin su 15 caba anto mester dos mas, esey no lo por pero lo por discuti e. E tipo di palabracionnan aki pues ta purbando di adelanta y reglanan for di awor.
