Diaranson tabata Dia Mundial di Riñon, en conexion cu esaki tabatin diferente actividad pa conmemora e fecha. Aki ta sigui un relato cu a ricibi di gobierno.

Minister di Salud Publico Alex Schwengle tabata presente den fin di siman na e actividad anual organisa pa Imsan relaciona cu e conmemoracion di Dia Mundial di Riñon. World Kidney Day ta haya atencion henter e siman aki na Aruba pa medio di diferente actividad y accion di conscientisacion pa promove un miho cuido di e organonan vital aki.

Tur e diferente organisacionnan y departamentonan cu tin di haber cu cuido di riñon ta uni pa un programa special pa pashentnan di dialyse, pashentnan cu tin diferente complicacion di nier y comunidad en general. Kidney Disease and Obesity, Healthy Lifestyle for Healthy Kidneys ta e tema mundial pa 2017. Enfermedad di Riñon y Obesidad, Estilo di Bida Saludabel pa Riñonnan Saludabel. Y, un biaha mas minister Schwengle ta recorda nos comunidad cu ta importante pa tur hende bebe (mas) awa, come menos salo, preveni y mantene un bon control di malesanan manera presion halto y diabetes y haci ehercicio. E actividad den fin di siman na Imsan tabatin actividadnan pa entretene e muchanan, hopi informacion, y hasta demostracion pa adultonan siña con pa traha snacknan saludabel.

Un estilo di bida no ta caro, pero ta pa un gran parti consisti di miho escogencianan, e minister ta subraya. El a agrega cu ta berdad cu fruta y berdura na Aruba ta importa y naturalmente lo costa un poco mas cu si cumpra nan na un pais cu ta produci nan. Pero asina mes tin opcionnan y ta bon pa esunnan cu kier siña mas acudi na un dietista/nutricionista pa combersa tocante diferente escogencia cu nan lo por haci.

Si cambia un custumber dañino pa un custumber bon, por ehempel stop di cumpra sigaria, stop di come demasiado chips y en cambio inverti e placa aki den miho cuminda, esaki sigur lo faborece e estado di salud di e persona, e mandatario tambe ta expresa. E mandatario a subraya e impacto cu riñonnan cu ya no ta traha bon of no ta traha mes mas tin riba e calidad di bida di e pashent cu mester tuma dialyse. Finalisando e ta splica cu e pashent ta perde practicamente tres dia completo di cada siman pa e bay tuma dialyse y ta consehabel pues pa tur pashent cu por posiblemente preveni y evita daño (mas) grandi na nan riñon, pa nan haci nan best pa logra keda mas largo posibel mas saludabel y consecuentemente cu un miho calidad di bida.