(AP) – No tin nada cu ta compara na ricibi un bouquet di flornan fresco. Nan por alegra un camber, trece naturalesa den cas y si bo tin suerte, tin un dushi fragancia.
Pero nada ta kita e alegria aki mas cu flornan morto, yen di slijm cu ta hole malo den un vaas di awa bruin.
Bacteria ta un di e causanan principal pa e morto prematuro di bouquet. Su presencia den awa di vaas ta tapa e taki y ta agilisa e fayecimento di e flor. Deshidratacion, sea di falta di awa of falta di e taki su habilidad di absorbe esaki, ta resulta den e morto di e flor. Exposicion na e gas ethylene cu otro flornan of frutanan cu ta putriendo tambe ta agilisa esaki.
Sinembargo, cu preparacion y cuido apropia, bo por aumenta grandemente e bida di bo bouquetnan.
Prome, mester pone un fin na e mal conseho cu ta andando; a pesar di loke bo por a lesa, placha e punta di e taki no ta aumenta e habilidad di e taki pa absorbe awa, de hecho, esaki ta destrui un porcion di e taki su sistema vascular, responsabel pa transporta awa. Esaki tambe ta expone parti di e taki fresco na awa, cual ta haci cu esaki lo putri mas lihe.
Si bo ta cortando e flornan for di un hardin, haci esaki mainta ora cu e takinan ta mas hidrata y inmediatamente pone esaki den un container cu awa.
Sin importa si bo bouquet a ser piki of cumpra, e tipnan aki lo grandemente mehora su duracion:
1. Semper cuminsa cu un vaas limpi
2. Kita cualkier blachi cu ta cay bao e linea di e awa
3. Usa un cuchiu skerpi y limpi p kita 1 pa 2 inch di e taki na un angulo di 45 grado. Esaki lo maximalisa e area y permiti e flornan absorbe mas awa ademas di preveni blokeo cu por resulta ora cu e taki ta flat contra e parti abao di e container. Pa takinan cu ta mas manera palo, raspa parti di e cobertura pafo despues di corta esaki na un angulo.
4. Agrega cuminda pa flor. E paketenan cu ta bini cu bo bouquet ta contene sucu, acido citrico y clorox, cual ta baha e awa su pH y ta preveni e crecemento di bacteria. Sigui e instruccionnan di e paki pues usa demasiado di esaki por kima e blachinan y corta e bida di bo flor.
5. Agrega ¼ copi di soda di citrus cu sucu of un cuchara di vodka manera un mehorador. Soda ta yuda mantene e awa acidico y ta alimenta e flornan mientras cu vodka ta evita cu esaki lo putri.
6. Mantene e flornan leu di fan, calentador, bentana habri of airco, luz di solo directo y leu for di frutanan pa motibo cu nan ta emiti ethylene mientras nan ta yega etapa di putri.
7. Laba e vaas, kita e flornan of blachinan cu ta muriendo y kita un otro kwart te mita inch di e takinan ademas di reemplasa e cuminda y mehorador cada pasa un dia.
8.Tin un motibo dicon floristerianan ta mantene nan flor den un luga refrigera. Di mesun manera cu e ta haci cu cuminda, refrigeracion ta mantene e flornan fresco pa mas tempo. Hinca bo bouquet den frigidaire tur anochi pa haci e proceso di muri mas poco poco.
