– Habitantenan di Parkietenbos y Simeon Antonio ta pidiendo auxilio atrobe. Durante di e ultimo dianan y simannan cu a pasa bisiñanan a scucha zonidonan fuerte di explosion riba dump di Parkietenbos. Famianan cu ta biba den cercania di e dump ta pasando mal anochi y no por drumi trankil ya cu mayoria di e explosionnan aki ta sosode den oranan di anochi y algun di nan basta laat den anochi lantando bisiñanan tur angustia.
Mientrastanto awor cu e biento fuerte di cuaresma a baha muskita grandi ta molestiando e famianan den e bario. Segun e bisiñanan e muskitanan aki no ta laga nan cana ni tampoco sinta trankil pafo den cura di nan cas y ora cu nan dicidi di bay paden e muskitanan aki kier insisti pa drenta paden di cas y sigui molestia tambe. Nan ta para riba tur cos, muraya, vloer, paña na cabuya, riba man y cabes, mesa, cuminda y beker.
Pa loke ta e explosionnan e bisiñanan ta pensa aki por ta trata di e asbest cu a ser tira riba e dump recientemente di e edificionan cu a ser renoba. E dump no tin luga mas pa pone sushedad, el a yena y situacion aki ta uno alarmante cu ta afectando seriamente e naturalesa den e bisindario y e ambiente di biba di e famianan den e bario. Pero alabes e ta afectando imagen di Aruba tambe, dumpnan asina habri y canto di lama ya no ta ser permiti mas.
