Habitantenan di bario Seroe Lopes a organisa un rueda di prensa ayera pa pidi gobierno actua contra e dump priva na Tamarijn cu ta keto bay causando molester ainda, ultimo atrobe siman pasa. E habitantenan mes lo tuma siguiente pasonan di entrega keho na Ministerio Publico e siman aki.

“Instancianan ta purba yega na un solucion y no ta logra. No na un manera suficiente lihe y nos ta den peliger. Nos ta pidi minister Dowers pa mustra su boluntad, haci esaki un reto personal pa su mes y bin cu un solucion,” habitante Luc Alofs ta comenta. Manera cu Bon Dia Aruba a informa, dia 3 di april un candela grandi a start den un dump na Tamarijn/Seroe Lopes cu a core cu basta habitante for di e area cu no por a keda drumi na nan cas pa algun dia. E tereno causando molester ta un zandafgaving cu a wordo uza como dump ilegal pa hopi tempo caba segun habitante Sr. Alofs. “Lamentablemente nos mester a bay prensa, acerca polis varios biaha na aña 2001, 2010 y 2012 a organisa un protesta anto colecta varios firma di nos bario. Na 2012 door di tur cos cu a sosode den nos bario, politica a bira activo, gobierno a formula un maneho pa controla henter e problema di dumpmento ilegal na Aruba(maneho Cero Tolerancia). Pero despues di un par di aña bo ta ripara cu toch e problema no a stop,” Sr. Alofs ta comenta.

Canando caminda di cruz
E habitantenan ta enfatisa cu nan ta canando un caminda di cruz y ainda no tin indicacion cu ta bin un solucion pa e problema aki. E prome caminda tabata ta expectativa di minister di Husticia cu a priminti di bin cu un solucion, segun sr. Alofs. “Na Aruba nos tabata tin mas cu 30 dump ilegal y na varios ocasion gobierno a tapa buraconan y dumpnan ilegal bao afval etc. pa controla e peliger di e dump. Nos a pensa esaki lo a sosode aki tras tambe cual lamentablemente te ainda lo ta e caso.” Tambe segun sr. Alofs, minister a priminti di reinstitui e comision cu ta percura pa e maneho di Cero Tolerancia bira efectivo.
“Nos ta spera cu minister ta persigui cu e proceso ey pasobra nos mester yega na un solucion y nos no por haci esey sin ayudo di minister.” E habitantenan tin contact cu polis na un manera hopi positivo kende a compronde nan situacion segun sr. Alofs. Polis a bisa cu lo traha un rapport pa Ministerio Publico pero esaki tampoco no a tuma luga ainda pa e pasonan cuminsa wordo tuma.

Otro caminda pa cana
E habitantenan a haya un kortgeding via un abogado cu kier a yuda soluciona esaki. Abogado di e doño di tereno a dialoga cu abogado di e habitantenan pero te ainda nada a bini di esey tampoco. E tereno ta basta grandi y hopi hundo (10/20 veld di futbol, 10/20 meter hundo) anto tur e sushi ta broei cu cada rato algo chikito ta sosode y causa cu esaki ta cende na candela atrobe. Sr. Alofs ta bisa: “Nos tin indicacion fuerte cu tur tipo di sushi ta wordo tira eyden, asbest y hopi mas. Door cu polis, nos abogadonan y gobierno no ta asina leu ainda, nos tin cu tuma un paso extra. Esey kiermen cu como ciudadano nos mes lo acerca Ministerio Publico e dianan aki pa nan actua riba e caso. Nos ta kere cu nos tin un base legal pa haci esey. Nos no ta specialista riba e tereno di ley pero nos si sa cu tin problema ‘hinderwetvergunning’ y cu diferente articulonan di APV (Algemene Politie Verordening) y tambe cu e ‘wetboek van strafrecht’.”