Bon Dia Aruba a ricibi un yamada di habitantenan di Simeon Antonio y Parkietenbos dirigi na e trucknan grandi cu pa hopi luna ta core den e barionan causando molester y insiguridad. Awor cu e rotonde nobo di Sero Teishi a habri, nan ta pidi e chauffeurnan pa uza esaki y no core mas den e barionan.
“Habitantenan di Simeon Antonio y Parkietenbos durante e ultimo lunanan a soporta masha hopi molester di e trucknan cu mester a uza e ruta den e bario pa cumpli cu nan trabao. E habitantenan di e bario a compronde y a soporta. Pero awor cu e rotonde nobo a habri y e ruta nobo pa yega Barcadera y Dump a bira mas facil y atractivo pa e pueblo, ta pidi awor cumpli cu e pueblo y debolbe bek e trankilidad na e bario y uza e rotonde y ruta nobo.”
Ayera mainta varios incidente a sosode tanto cu chauffeurnan di autonan di famia y tambe cu peatonnan cu ta haya nan mes ta sali na careda crusa y otronan cu ta ser cera riba caminda pa e trucknan, asina un habitante ta conta. E situacion aki no por sigui, segun e y ayera varios habitante a expresa nan disgusto cu e situacion y a laga si di lo bay pidi DOW pa laga pone verkeersdrempel of polis drumi. “Un apelacion ta bay na tur e companianan di carga y di tur otro utilidad pa comunica cu nan chauffeurnan pa bisa nan pa haci uzo di e ruta nobo via e rotonde na Sero Teishi cual ta mas miho pa nan vehiculo y pa nos bario nos por biba bek cu mas siguridad y trankilidad.”
