E habitantenan bibando na Lago Heights cerca di e dump ilegal di abest riba e tereno di refineria, a bay corte e siman aki pa asina cuminsa un di dos caso.
E biaha aki ta trata di e procedura di LAR cu nan a entama na comienso di e aña aki. Manera Bon Dia Aruba a skirbi na april ora e hoorzitting a tuma luga, e hurista representando e minister di Husticia, no tabatin informacion pa defende e banda di gobierno. Tambe e hurista, kende ta encarga cu e seccion di permiso cu ta cay bou Departamento di Legislacion, a expresa cu e ‘no sa nada di permisonan duna recientemente como cu ta aña electoral y hendenan ta acercando ministernan directo pa pidi permisonan’. Segun e, e peticionnan tambe ta wordo honra. Esaki despues e minister. Arthur Dowers, a nenga ora Bon Dia Aruba a puntr’e riba esaki.
Nos tambe a puntra over di e caso di asbest y su carta unda el a indica cu gobierno a sigui tur reglanan ect. Pero e minister mes no tabata na haltura di e carta aki cual tin su nomber y firma bou di dje. El a yama hasta e departamento concerni DTI, pa puntra si e mes of e director a firma e carta aki p’e.
E termino pa minister duna su conseho den e caso di LAR aki a pasa mientrastanto. Como cu e minister aki no a tuma un decision, esaki ta considera como un desaprobacion fictivo (fictieve weigering). E siguiente paso e ora ta cu por bay corte pa apela e desaprobacion fictivo aki y pidi hues pa un decision.
Banda di e procedura administrativo di LAR, e habitantenan, esta e pareha De Vries, tambe a entama un caso contra Ministerio Publico (OM). Esaki tin di haber cu e actividadnan cu a tuma luga aña pasa unda Refineria di Aruba a laga un compania dera e asbest cu Valero a laga atras ilegalmente. Sinembargo segun ley esaki no ta permiti. E habitantenan a bay instancianan manera Departamento di Medio Ambiente, DTI, brandweer y polis pa purba di para e trabou. Pero niun instancia a actua. Finalmente nan a entrega un keho, cual tambe a bay dificil, na polis. Nan a puntra OM despues si nan lo bay investiga e caso. Sinembargo OM ta haya cu entre otro ta den man di instancianan gubernamental pa actua y investiga prome. Y cu nan no ta mira awor cu algo castigabel a tuma luga.
Bon Dia Aruba ta keda sigui riba e caso aki. Y tambe riba e caso nobo di WEB cu a cuminsa construi un parke solar riba e mesun tereno, unda tampoco a tene cuenta cu e ley.
