Recientemente Bon Dia Aruba a haya un carta di habitantenan di Simeon Antonio dirigi na alto comisario di Polis Sr. Ramon Arnhem pa entrenamento cu ta tumando luga den bario aki y cu ta causando molester na e habitantenan.

Den e carta, e bisiñanan ta splica cu frecuentemente ta tumando luga entrenamento di KPA, den cercania directo di hogarnan riba e parkeo di e centro deportivo di Simeon Antonio. Esaki ta causando hopi molester pa e habitantenan di e vecindario rond di Centro Deportivo Simeon Antonio, principalmente Bucutiweg y Gonzalitostraat.

E holo penetrante di burnout di tire, zonidonan fuerte di sirena, brake, gritamento y otro molesternan relaciona cu e entrenamento ta afectando di manera directo e calidad di bida di e habitantenan di e vecindario menciona.

E situacion insoportabel cu e entrenamentonan ta causando ta violando e derecho fundamental di e habitantenan pa disfruta di trankilidad den nan propio hogar (“eerbiediging persoonlijke Levensfeer”). Adicionalmente, studiantenan cu ta sigui online schooling ta enfrentando dificultadnan pa concentra y studia durante dia a causa di e entrenamentonan aki.

Habitantenan di e vecindario ta compronde y reconoce e importancia di e entrenamentonan di KPA y e papel crucial cu nan ta hunga den preparacion y siguridad. Sinembargo, ta esencial pa tene cuenta cu derechonan humano fundamental tambe mester ser respeta. Ta importante pa tene un balansa entre e necesidad di entrenamento y e derechonan, bienestar y trankilidad di e habitantenan.

Den pasado, e habitantenan en cuestion a enfrenta problemanan cu drifting riba e parkeo, unda hasta miembro di polis a participa. E molesternan persistente a resulta den kehonan na autoridadnan. A pesar di kehonan constante na e autoridadnan, incluyendo polis, e molesternan a persisti. E habitantenan a keha na e gerente di e centro deportivo y na DOW, kendenan na aña 2018 a interveni y a zorg pa e colocacion di bolders hefboom.

Sin embargo, a pesar di e esfuersonan pa alivia e molesternan, awor e habitantenan ta sigui enfrenta otro molester debi na e entrenamentonan di polis na e mesun area.

“Habitantenan di Simeon Antonio a demostra di tin pasenshi y comprension durante decadanan pa situacionnan dificil. Nos a wanta entre otro, molesternan di e landfill Parkietenbos. Sinembargo esaki no ta hustifica pa sigui abusa di derechonan humano, bienestar y trankilidad.”

Habitantenan en cuestion ta haci un apelacion directo na Alto Comisario Sr. Ramon Arnhem pa reconsidera e luga di e entrenamentonan. E sugerencia ta pa traslada e entrenamentonan pa Palomarga, un luga mas adecua pa e tipo di actividad aki, of den un area leu di hogarnan.

E bienestar y trankilidad di e habitantenan mester ta prioridad. E necesidad di entrenamento no por y no mester ta na costo di e calidad di bida di e comunidad. Habitantenan en cuestion ta spera pa un solucion cu ta respeta tur partido involucra.

Habitantenan en cuestion ta urgi pa consideracion y accion, cu e speransa cu un solucion mutuamente satisfactorio por ser alcansa.

Pa finalisa e ta e tarea di KPA pa mantene orden publico. Orden publico ta nifica cu tin trankilidad y siguridad den comunidad, pa asina hendenan por biba na pas.