Ta bay haci 12 aña cu habitantenan di Seroe Patrishi den e projecto di casnan traha pa ‘Fundacion Cas pa Comunidad Arubano’ (FCCA) ta keha riba e situacion cu nan tin cu e pos. No obstante cu a purba trece diferente solucion, niun di nan a sa di alivia e situacion cu ta reina den e bario.
Di loke Bon Dia Aruba por a comprende e situacion a inicia na momento cu a traha e di dos projecto di casnan, lubidando di traha un di dos pos of amplia esun prome. Esaki a trece cune problemanan serio ja cu continuamente e pos lo ta bay over. A purba diferente solucion manera basha vloer di cement y te hasta laga un compania di chica pos pasa chica esaki; Dado momento e chicamento tabata pasa tin biaha mas cu siete biaha pa dia segun e habitantenan.
Locual mas ta disgusta e habitantenan ta cu ultimamente ta parce cu FCCA ta laba man door di bisa e habitantenan pa nan mes tuma contacto cu e compania di chica pos Eco Tech. Esaki pa algun di nan ta inacpetabel ja cu ta pagando hypotheek pa e cas unda nan ta habita y ta exigi un trato husto. Un habitante ta splica cu e no por ni sali for di su port’i cas ya cu e awa ta para net ey dilanti.
E awa aki ta para net den un area hopi uza, unda tin entre otro muchanan ta hunga. Por comprende cu departamento di inspeccion ta na haltura di e situacion pero a indica di no por haci nada ja cu ta trata tereno priva.
Bon Dia Aruba lo aserca FCCA pa puntra e motibo dicon te ainda no a yega na un bon solucion pa e problema aki cu ta recuri mas o menos 10 biaha pa aña.
