Par di dia pasa redaccion Di Bon Dia Aruba a ricibi informacion di habitante di Parkietenbos den cual nan a splica e preocupacion cu nan tin tocante nan bienestar di su comunidad, particularmente esnan cu ta biba cerca di Landfill Parkietenbos.

Nan a informa cu nan a nota cu den e ultimo dianan ta coba den e landfill y tin hopi polvo/mal holo y huma ta extende den e bario.

Nan a ricibi varios reporte di dolor di cabes severo, condicionnan respiratorio y nausea cu residentenan, incluyendo muchanan cu ta sufriendo particularmente durante e ultimo tres dia, na unda nan ta trata di documenta e magnitud di e problema aki.

Nan a pone autoridadnan al tanto tocante e situacion aki, specialmente minister di Naturalesa Ursell Arends, unda habitantenan a pidi na minister pa investiga debi cu tin varios mucha cu a bira malo y hendenan ta kehando di dolornan di cabes.

Nan tambe ta conseha pa reporta cualkier problema di salud na autoridadnan local di salud publico (DVG Aruba) y Ministerio di Salud Publico.

Na aña 2020, den luna di januari e portal di noticia local Noticiacla a publica un articulo cu e titulo “Gobierno ta bay investiga molester di habitantenan na Parkietenbos,” cual tabata bisa cu na e momento ey cu un keho oficial a drenta cerca y nan lo a cuminsa investiga.

Den keho entrega pa un famia cu ta biba den area aki tabata señala cu nan tabata sufri di molester di huma pa motibo di e dump na e momento ey, minister di Salud, Dangui Oduber a sigura esey den un conferencia di prensa.

“Basa riba esaki, no solamente nos ta bay check e keho aki cu a drenta, pero nos tin cu bay check tambe e salud di e habitantenan den henter e area aki, pa asina nos haya un bista kico ta e consecuencia y e efectonan cu tin di dump den e bisindario aki,” Oduber a bisa.

Mientras cu e mandatario a bisa cu ta bay investiga e dia ey, e no a specifica e periodo y ni tampoco ken tabata esnan encarga di haci esaki.

Te ainda habitantenan no sa si e investigacion ey a tuma luga, ni tampoco ki consecuencia y efectonan di e situacion aki por tin pa nan salud. Loke si ta berdad cu nan ta presentando molestianan di salud den e dianan aki.

Bon Dia Aruba a tuma contacto cu minister Arends tocante e situacion aki cu habitantenan ta experenciando, unda el a contesta cu “durante dia no tin operacion di e incinerator. Dump tampoco ta na candela. Dus a pidi departamento pa monitor pa wak kico por ta e molester cu ta afectando e habitante y bario,” Minister a contesta.

Potret di dump cortesia di Facebook Habitante Parkietenbos y esun di incinerator ta di minister Arends cu a manda na redactor e dia di ayera indicando cu incinerator no tabata cendi ayera.