– Habitantenan den e bisindario, caminda e nightclub ta wordo traha ta sigui haci tur esfuerso pa evita cu e nightclub ta wordo habri eynan. Bisiñanan a expresa nan mes publicamente riba e intencion pa para esaki.
E habitantenan a haci esaki via carta y tambe via media. Polis tambe a pasa cerca e habitantenan pa asina haci cumpli cu e proceso legal ora di duna tipo di permisonan asina.
E conseho cu Polis a duna ta cu ta negativo pa habri un nightclub den area habita. Cu e expresion den carta di bisiñanan y tambe conseho di Polis ta suficiente pa gobierno mira bon con nan lo atende cu e asunto aki.
Podernan den partido na mando mes, cu tin amistad cu e doño, ta purbando pa purba convence gobierno pa desvia di e conseho di Polis.
Bisiñanan ta spera cu Gobierno no faya pa satisface un grupo cu kier bin daña un area trankil. Tur hende sa cuanto problema tin tur weekend y den siman cu cierto areanan cu localidadnan similar cu ta cera te den oranan laat di marduga.
Siguridad di un area no por wordo poni na peliger. P’esey mes nan ta boga pa mantene e trankilidad cu tin y no por ta asina cu gobierno ta permiti pa trece intrankilidad.
Si gobierno desvia di conseho di Polis, nifica cu nan mester cuminsa caso den corte pa asina keda mantene e trankilidad di semper. Esey por wordo evita si gobierno mantene su mes na e reglanan y consehonan cu tin.
Den pruebanan cu a wordo haci algun dia pasa, a conforma cu ya tin molester sin cu e nightclub a wordo habri oficialmente.
