Den ultimo dianan aki 18 famianan di Calabas a keda sin coriente, e personanan cu nan tabata pensa cu tabata e doño di e luga a laga nan sin coriente, ora cu nan a bay reclama e cifra cu nan tabata paga pe no tabata esun mas rasonabel.

Bon Dia Aruba a bay investiga riba e hecho aki na Calabas 35D y a papia cu varios persona cu ta biba den e luga aki, un di nan ta Javier Perez ken a expresa cu primeramente ora el a yega te e luga mas di dies aña pasa e persona cu tabata doño di e tereno a huur un pida di tereno baho acuerdo sin firma contract.

Pa via di esaki, el a bisa cu tur e personanan cu ta biba eynan tin cu paga awa y coriente pa e meneer di fam Petronila, loke e meter ta marca den kilowatts ekivalente pa e cifra di 1 florin.

Ora e añanan a pasa e situacion di coriente a bira mas complica, prijsnan a subi y el a splica cu nan no tin airco ni nada cu por causa un aumento den e prijs di coriente. Varios persona di e luga a reuni pa papia cu Petronila pa asina resolve e situacion y loke nan a haya tabata cu tur 18 famia ekivalente pa mas di 50 persona cu muchanan chikito a keda sin coriente pa e dianan di Pasco.

Di mesun manera, Perez a bisa cu nan a bay Elmar pa reclama e hecho aki, pero nan a haya e sorpresa cu e meneer Petronila tabatin un debe, es decir, cu tur e placa cu e famianan a paga cash nan no sa na unda esaki a bay, asina mes nan a constata cu tambe pa falta di pago di impuesto e no ta doño di e tereno mas.

Mirando e situacion, Perez a comenta cu Petronila a manda un carta den cual ta pidi pa e famianan bandona e tereno, “awor nos no sa kico nos por haci, nigun di nos ta gana mas cu 1.800 florin pa luna, nos tin muchanan chikito, na unda nos por bay? “ Perez a manifesta.

Den mesun momento cu e reportero di Bon Dia Aruba tabata entrevista e personanan aki, a yega un comision di gobierno cu tres trahado social cu varios formulario pa nan por yena nan datonan y entrega pa e persona concerni di ministerio di Asuntonan Social.

Un di e trahado social a bisa pa nan cu e luga ey ta hopi peligroso pa nan, nan tabatin basta aña bibando eynan di un manera asina pa organisa nan mes como famia.

Loke tambe nan a duna di conoce ta cu nan kier haya mas informacion di cada un di e famia pa wak con nan por yuda, asina mes nan a sigura cu nan ta trahando duro pa yega na un solucion temporal mientras cu nan ta busca vivienda apto pa nan mes.

Tin varios departamentonan di gobierno involucra den e caso aki como DOW, DHC,DTI, BRA, DAS y Elmar, hasta Departamento di Relacionnan Exterior.

Bon Dia Aruba tambe a haya un entrevista cu Albertico Koolman director di Elmar y el a conta cu ora un comision di Elmar a bay check nan no ta cliente, pa motibo cu un adres tin un doño so y Petronila a pidi pa nan kita su meter y asina Elmar a kit’e, pero nan no tabata sa di e situacion di Calabas 35D.

Koolman a bisa cu Elmar ta lamenta e situacion aki cu ta dificil pa e personanan ey, diahuebs ultimo nan a bay haci un investigacion pa asina wak kico a pasa y nan a constata cu tabatin diferente waya di e cual nan tabata conecta riba un cas so.

Tambe nan a ripara cu e instalacion no tabata adecua y sigur, segun e normanan di awendia, tambe el a resalta cu nan a contact DTI di e situacion aki.

Koolman a specifica cu nan no sa ken ta e doño di e parcela, e doño mes tin cu bay te Elmar pa por haya e meter bek, pero e situacion ta con e instalacion ta, “mi no ta kere cu nan por haya coriente pa e dianan aki mirando con peligroso e situacion ta”, el a sigura.

Pa finalisa, e habitantenan di Calbas 35D a bisa cu na e momentonan aki un persona a fia nan algun generator di coriente pa nan por mantene nan cuminda den frigidaire, pero esey no ta mesun cos naturalmente, “esaki ta un sorpresa pa nos loke nos ta bibando den dianan aki, specialmente Pasco cu mester ta un temporada di reflexion”.