Habitante hopi preocupa cu situacion di tiramento actualmente na Aruba

 Ultimamente comunidad ta scuchando diferente casonan di tiramento y un habitante di Primavera ta avisa cu hamas e la pensa cu algo asina ta bay bira comun na Aruba. E habitante aki ta preocupa cu pronto comunidad di Aruba ta bay tin cu enfrenta bala los den aire cual e ta bisa ta mata hopi hende inocente den paisnan bisiña.

”Mi tin tres bisiña polis, y mi ta puntra mi mes si nan tambe ta scucha esaki?”

Segun e habitante aki cu ta prefera di keda anonimo, e ta scuchando e tironan pa casi 1 aña caba y ta mustra cu e situacion ta bay keda bira pio. ”Prome tabata durante dia y ultimo biaha ta dia cu mi a post riba Facebook anto esey tabata den mardruga. Na inicio, mi a pensa cu e tabata clapchi, pero den mardruga ora cu mi a drenta mi auto den cura na caminda pa drenta den mi cas mi a bolbe tende 5 tiro alrededor di 2 or di mardruga” , e habitante ta splica.

Na e momento aki e ta agrega cu tabata bon cla cu esaki tabata tiro di arma di candela y no di clapchi.  ”Na paisnan Latino, bo por cana cu un arma si bo tin permiso y hopi di mi omonan tur ta arma eynan y ami sa con un bala di arma ta zona” .

Aruba no conoce fenomeno di ”Bala Los”
E fenomeno di ”Bala Los” ta existi entre otro den paisnan Latino por ehempel unda hendenan di baho mundo ta djis los bala pa loco y tira den laira of den cualkier otro direccion cu nan kier sin tene consideracion di e siguridad di otro hende. Mayoria di biaha, e situacion aki pa mala suerte ta causa hopi morto inocente.  Segun un estudio di aña 1962 ta señala cu un bala cu bo tira den laira por yega na alcansa un velocidad di 220 te cu 330 km/h dependiendo di e caliber y angulo cu e cay y e biento tambe ta hunga un rol grandi di cual nos tin hopi na Aruba. Na e velocidad ey caba e ta suficiente pa por penetra bo den bo cabes of cualkier otro parti di bo curpa causando morto mes. 

”Na Aruba nos no conoce e fenomeno aki pero si mas arma keda drenta , nos tin un problema serio cu nos lo mester enfrenta” , e habitante ta bisa.

Algun solucion cu por wordo implementa
Bon Dia a puntra e habitante aki, den punto di bista di un cuidadano cu ta un Arubiano y kier mira cambionan positivo cuminsa wordo implementa de inmediato, kico por ta un bon solucion pa cuminsa pone un paro na e tipo di incidentenan aki prome cu nan bira mas grandi? E habitante ta contesta cu e ta kere hopi cos por wordo haci y esaki ta keda na cada Gobierno con pa drecha of mehora esaki;

1.Activa e radaar bek den nos awanan.
2.Activa scanner na unda carga ta drenta paso baho mundo lo keda
pensa maneranan facil pa drenta cu arma pa por bende esaki y gana placa.
3.Activa un plan di mas control den nos awanan, mas guarda nos costa activo den nos awa durante dia y anochi.
4.Activa nos helicopter atrobe.
5.Activa of implementa leynan cu castigo mas halto si nan hayabo cu arma den bo poder.
6.Cuerpo Policial por cuminsa un campaña amistoso, entrega bo arma y haya 500 florin of 1000 florin cash como un regalo atractivo pa por yuda elimina arma riba caya. Esaki por ta den un manera anonimo. (Curacao a haci esaki y colecta basta arma)
7.Cuminsa un control y inventarisacion pa esnan cu tin of ta haya un permiso special di Gobierno pa wak si e armanan aki di berdad ta den man corecto.
8.Gobierno mester busca tur manera pa introduci un ley di ‘Self Defense’ urgente!

”Pakico ‘Self Defense’? Pasobra actualmente pa cada 200 cuidadano na Aruba tin 1 polis. Mahinabo 1 polis pa cuida 200 hende? Si bo gara e ladron na bo cas y bo dune un bati, ken ta bay sera? E doño di cas y e ladron ta bira conosido di polis y lo bo mire liber siguiente dia.” 

”Mi no ta sintimi mesun sigur den mi bario mas”

E habitante ta splica Bon Dia cu e tin 22 aña ta biba den e bario di Primavera y for di e tempo ey AVP tabata na mando y nan a haya bishita 3 biaha den 1 aña. Despues di esey, nan mester a cuminsa inverti den sistema di alarma, sera cura y haci hopi adaptacion y nunca mas nan a haya un bishita for di gobierno. ”Awe, ta bala mi ta scucha dus e situacion a bira hopi mas pio paso hera nan no ta bin bo cas pa horta, nan ta wardabo cu arma den bo cura mes!” E habitante ta bisa.
E ta finalisa cu 1 aña atras pa awe nada no a cambia paso su mesun bisiñanan cu tin mesun tempo ta biba eynan cune tambe a lanta nan cura completo paso algun siman atras hende tabata haciendo straño eybanda. ”Mi tin un pitbull pero mi ta kere i lo mester busca 2 mas pa renforsa nos famia” .