Exxon Mobil y Hess Corp. a anuncia cu nan ta adelanta e fecha di inicio di e prome produccion di petroleo na Guyana pa december na lugar di e fecha anterior programa pa comienso di 2020.
E proyecto Liza Phase 1 ta solamente e comienso di e esfuerzo acorda, lidera pa Exxon Mobil pa transforma e nacion Suramericano chikito den un importante productor di petroleo riba alta mar den e proximo añanan.
Hess, cu sede na New York, a anuncia via su presidente ehecutivo, John Hess, cu lo tuma aproximadamente tres luna pa yega na produccion na su capacidad di 120.000 ekivalente di bari (gas y petroleo) pa dia, segun diario Houston Chronicle.
E punto focal di e prome fase ta e instalacion di Liza Destiny, un embarcacion flotante di produccion, almacenamento y descarga, yama FPSO, cu a yega na e sitio na augustus. E barco di 1.115 pia lo procesa produccion di 17 pos durante e prome fase.
E segundo fase di Liza lo cuminsa na mita di 2022. Ta spera cu e proyecto aki lo produci 220.000 bari di ekivalente di petroleo pa dia. Un tercer fase, yama Payara, ta programa pa 2023 tambe cu produccion di 220.000 bari pa dia.
Den menos di cinco aña, Exxon y Hess a anuncia 14 descubrimento den lama di Guyana. Nan a aumenta nan calculacion di reserva recuperable bao lama na Guyana na mas di 6.000 miyon di ekivalente di bari.
Exxon Mobil awor ta spera di produci mas di 750.000 bari di petroleo pa dia dilanti costa di Guyana pa 2025. Esey ta ekivalente na casi 20% di e produccion mundial actual di petroleo y gas di Exxon.
Exxon tin un participacion lider di 45% den e proyecto, cu Hess controlando 30% mientras e restante 25% ta di China National Offshore Oil Corp., conoci como CNOOC, por medio di CNOOC Nexen Petroleum Guyana Ltd.
