Como un señal di e crisis cu ta empeorando na Guyana y pa e gobierno demisionario di presidente Granger, e mision observador di Organisacion di Estadonan Americano (OEA) a anuncia ayera cu nan ta retira di e pais ya cu e proceso di conteo na Region Cuatro no ta transparente a pesar di e multiple kehonan tocante esaki.
Den un declaracion e mision di OEA a adverti cu cualkier gobierno cu keda instala di e manera aki lo ta obheto di cuestionamento. Tambe a anuncia cu ta preparando un informe pa Secretario General di OEA, Luis Almagro. Segun e declaracion duna pa e mision, e proceso di conteo den Region Cuatro no ta cumpli cu e standard rekeri di transparencia.
E anuncio di e mision observador ta bin dos dia despues cu Corte Supremo di Guyana a ordena e recuento di voto na e region specifico aki, despues di denuncia di varios partido opositor contra e forma con afiliadonan na gobierno di Granger a hiba e conteo.
Segun e declaracion, e veredicto di Corte Supremo tabata exigi di e ‘Returning Officer’, e autoridad den e region pa acumula y certifica e resultadonan di e region, pa determina e miho metodo di administra esakinan na un manera cu ta permiti e partidonan envolvi pa mira kico tabata conta y con.
Sin embargo, esey no a sucede y e desafio di e Returning Officer di e veredicto pa permiti otronan di mira e declaracionnan di resultado, ta duna base na e acusacionnan di oposicion cu e cifranan registra no ta cuadra cu e resultadonan di e urnanan prepara despues di eleccion di 2 di maart.
“Legitimidad di cualkier gobierno cu keda instala den e circunstancianan aki lo ta habri pa cuestionamento. Esaki lo ta un terible golpi pa democracia na e pais. Pueblo di Guyana no ta merece esaki,” e declaracion ta conclui.
