Segun articulonan recien den portalnan noticiero di Guyana, NewsRoom y Guyana Chronicle, e pais ta liderando e agenda ambicioso di seguridad di alimento di Comunidad Caribense CARICOM, pero e pais kier agrega Aruba na e lista di pais cu ta suministra cu cuminda, y posiblemente algun otro pais tambe.

Esaki segun presidente Dr. Irfaan Ali, kende a papia na e ceremonia di comision di facilidad marino nobo di GAICO na Nismes, West Bank Demerara riba diasabra.

Segun e hefe di estado Guyanes, su gobierno kier pa economia local ta uno bon diversifica. Pues ta haciendo inversion pisa den sector no-petrolero pa asina sigura cu nan ta competitivo.

Y e sector di agricultura, el a bisa, ta goza di hopi atencion di gobierno.

Unabes cu Guyana por satisface comodamente su necesidadnan di cuminda, y esnan di CARICOM, e pais kier exporta mas di su caminda na otro logarnan.

“Nos ta negociando un Memorandum of Understanding cu Aruba riba con Guyana por ta e hub di suministro di cuminda pa Aruba. Unabes cu esaki ta exitoso, nos por e ora bay otro paisnan,” presidente Ali a anuncia diasabra.

Aruba, Dr. Ali a splica, ta importa mayoria di nos cuminda, pues gobierno ta kere lo ta un bon mercado pa producto Guyanes.

Guyana actualmente ta lidera e meta di CARICOM 25 pa 2025, cu ta involucra paisnan di CARICOM reduciendo nan importacion di cuminda extra-regional cu 25% pa 2025. Intencion ta pa logra e meta door di aumenta produccion y comercio di cuminda dentro di e region.

Un dia prome, papiando cu residentenan di Coverden, East Bank Demerara, e presidente a duna un pista cu gobierno ta considerando un servicio di ferry entre Guyana y Aruba. E area aki ta conoci pa su actividadnan agricultor.

Presidente Ali a dirigi su mes na agricultornan local, reconociendo e recursonan terestre substancial den e area y retando nan pa colabora efectivamente. Cu mas cu 200 acre di tera agricultor maneha colectivamente pa un grupo di agricultor, el a urgi nan pa explora modelonan di agricultura integra pa produccion di cuminda a gran escala. “Nos mester mira con nos por usa e 200 acre di tereno aki di e miho manera, sea bo por bay den un agricultura integra cu produccion di cuminda a gran escala y haci esaki e granja modelo y area modelo pa esey… Aki ta unda boso mester bin hunto y traha hunto. Pasobra si esey ta e caso, e ora nos sa cu nos tin 200 acre di tereno cu nos mester integra den un manera specifico. Nos mester pone algun infrastructura cu ta hacie competitivo pa tur hende. Boso ta comparti responsabilidad di maneho. Nos sa cu boso tin 200 acre pa cria bestia. Pues nos mester pensa un tiki diferente tambe,” e presidente a bisa.

Servicio di ferry den CARICOM

Ali a destaca e importancia di genera mas entrada pa Guyana mientras ta reforsa sector di agricultura. Un di e iniciativanan pa genera entrada cu el a resalta tabata e partnership entre Guyana y su contrapartinan den CARICOM, Barbados y Trinidad & Tobago pa establece un servicio di ferry cu lo transporta cargo y pasahero.

Aña pasa, Banco di Desaroyo Caribense a anuncia cu ta bay financia servicionan di consultancy pa un estudio pa explora opcionnan pa establece un Servicio di Cargo Maritimo entre Barbados, Grenada, Guyana, y Trinidad & Tobago principalmente pa move producto agricultural. E iniciativa, segun CDB, ta parti di un promesa di e institucionnan pa mehora seguridad di cuminda dentro di Caribe y promove cooperacion regional.

Presidente Ali a revela discusionnan andando pa un servicio di ferry cu Aruba, specificamente personalisa pa transportacion di producto agricola. “Manera boso por wak, ya nos ta trahando duro pa drenta den mercado CARICOM di un manera fuerte. Nos a cuminsa discusionnan cu Aruba pa tin un ferry cu ta mira specificamente produccion, hiba producto agricultural eynan. Pues produccion di cuminda ta bay ta un parti principal di nos desaroyo. Pues, si nos tin mayor produccion den un area specifico, e ora bo por tin e produccion saliendo for di eynan pa suministra e regionnan. Mi kier pa nos pensa riba esey,” Ali a bisa durante su encuentro cu e agriculturanan di Coverden.

E idea di e ferry ya a keda menciona despues di un estudio di Comision Economico pa Latino America di Nacionnan Uni. Segun e estudio, Guyana ta un di varios pais Caribense cu ta candidato fuerte pa inclusion den un red di ferry regional si usa barconan mas slow. E modelo proponi PPP (Public-Private Partnership) tambe lo inclui e renobacion y mehoracion di werven na e rutanan sugeri, cu na su bes por crea costonan mas batata pa destinacion compara cu avion.

E propuesta aki, presenta pa Associate Economic Affairs Officer di ECLAC su Unidad di Servicio di Infrastructura den Division di Comercio y Integracion Internacional, Diogo Aita, ta inclui cuatro ruta. Ruta number uno ta inclui Colombia, Aruba, Bonaire, Corsou, Trinidad & Tobago. Ruta dos ta inclui Trinidad & Tobago, Guyana y Surnam. Ruta tres ta utilisa biahe entre Puerto Rico, Antigua y Barbuda, Guadalupe y Saint Lucia, mientras ruta cuatro ta inclui Saint Lucia, Saint Vincent, Grenada y Trinidad & Tobago.

Por lesa e relato completo di CEPAL riba https://whoswho.gy/sites/default/files/Bulletin%20394%20Proposal%20for%20the%20implementation%20of%20a%20ferry%20service.pdf