Guyana su gobierno di coalicion a cay diabierna pasa despues di un voto di desconfiansa den parlamento, causando asina e necesidad di eleccion general, menos di cuatro aña despues cu e gabinete di presidente David A. Granger a drenta y casi dos aña prome cu e gabinete termina su periodo regular di gobernacion.
E collapse sorpresivo a termina cu e coalicion entre e partido Indo-Guyanes y esun Afro-Guyanes, cu a priminti di bin cu un estilo di goberna diferente, derotando e partido cu a goberna Guyana pa mas di dos decada.
Un militar pensiona, Granger tabatin problema pa controla su gabinete y no tabata diligente pa crea un cuadro di regulacion legal y ambiental pa prepara e pais pa su prome produccion di petroleo, cu ta programa pa 2020.
E descubrimento di petroleo pa e multinacional Exxon Mobile den lama dilanti costa di Guyana ta brinda e perspectiva di cambia economia di e pais di apenas 750.000 habitante completamente. Pero hasta e asesornan di e pais a adverti, cu e historia di corupcion di e pais na mente, cu esaki por bira un gran desperdicio di biyones di dollar di entrada anual di impuesto y royalties.
E coalicion a perde e votacion di desconfiansa despues cu un parlamentario, Charandass Persaud, di e partido menor den e coalicion, a cambia di banda. Moses Nagamootoo, e prome ministro, a reconoce e perdida bisando “Nos mester acepta e resultado.”
Den e proximo eleccion bista ta riba e partido den oposicion, People’s Progressive Party (PPP), cu ta mantene actualmente casi 50% di e Asamblea Nacional y tabata fuerte den eleccion local.
