E segundo bolsa mas grandi di mundo, NASDAQ, a nombra Guyana e economia cu ta crece mas rapido na mundo actualmente.
Den un informe NASDAQ ta bisa cu un crecemento proyecta na 16,3% durante e periodo di cuatro aña 2018 – 2021, lo pone Guyana como e economia cu e crecemento mas rapido na mundo.
NASDAQ ta bisa cu Guyana, cu un GDP di US$ 3,63 biyon (na 2018 na posicion 160 di mundo) y un crecemento di 4,1% na 2018 y 4,6% na 2019, su economia lo crece cu 33,5% y 22,9% na 2020 y 2021 respectivamente.
E informe ta añadi cu Guyana ta actualmente un pais cu un entrada mediano cu tin un abundancia di recurso. Tambe ta bisa cu e descubrimentonan haci pa ExxonMobil y e entradanan cu e pais lo ricibi, ora produccion di petroleo cuminsa otro aña, lo ta grandi.
Ta anticipa cu Exxon ta cuminsa cu produccion di 120.000 bari pa dia di crudo di e bloke ‘Liza Phase 1’ otro aña y e pais ta proyecta pa ta entre e productornan mundial cu mas bari ‘per capita’ pa aña 2025.
Guyana, cu alrededor di 780.000 habitante actualmente, ta na caminda pa un produccion bastante mas grandi cu e produccion inicial, mirando e otro descubrimentonan cu ExxonMobil a haci den awanan teritorial di e pais, cu lo ser desaroya den e proximo añanan.
