Dia 12 di mei ta bay tuma luga e di 31 edicion di Ronde van Aruba. Guus Weltings y Piet van Oosterhout ta preparando pa participa den e gran evento, pa recauda fondo pa e fundacion Trampolin pa Trabou. Den un entrevista cu Bon Dia Aruba nan ta conta di e meta y con nan a yega na e iniciativa aki.
Guus Weltings ta traha como un account manager na The Lab marketing agency y Piet van Oosterhout ta un docente na scol primario De Schakel. Joey van Leeuwen, nan chauffeur durante e evento aki, ta traha actualmente na Marienierskazerne na Savaneta.
E pareha di tanto Weltings como di Van Leeuwen tambe ta traha como docente na scol primario De Schakel y asina e grupo a cera conoci otro y a cera un amistad. E participantenan a yega di hunga futbol hunto tambe cu e ekipo S.V. Mercurius Aruba.
E enfoke di e iniciativa aki, nan a splica, ta pa recauda fondo pa e fundacion Trampolin pa Trabou, un fundacion cu ta duna personanan cu discapacidad un miho oportunidad pa haya un luga den mercado laboral na Aruba.
Nan a sigui conta cu Weltings y Van Oosterhout tabata pensando caba di participa den Ronde van Aruba, cu e ayudo di Van Leeuwen como nan chauffeur pa hopi tempo caba, pero nan tabata kier nan participacion tin un rason special.
“Nos a haya e rason ey ora cu nos a cuminsa papia di recauda fondo pa un fundacion local,” Weltings a indica.
Nan a scoge Trampolin pa Trabou pa motibo cu Oosterhout tin un ruman cu discapacidad cu ta biba na Hulanda. Personanan cu discapacidad tin menos oportunidad pa haya un trabouao den e mercado laboral, y na Aruba e oportunidad ey ta mas chikito. Pa e motibo aki nan a scoge Trampolin pa Trabou como e fundacion local pa cual nan lo core Ronde van Aruba.
Segun nan ta splica, Trampolin pa Trabou lo usa e placa cu nan recauda pa mehora nan facilidad. Nan lo renoba un unidad di container pa nan por duna guia y training na e personanan cu discapacidad. Ademas di esaki nan tin mester tambe di mesa, stoel, airco y mas cos.
Apart di e renobacion di e unidad di container, tin otro facilidad cu tambe tin mester di un mehoracion. Algun di esaki ta inclui e dak di un veranda cu ta completamente putri; pero tambe mester drecha e cushina profesional cu e fundacion ta usa pa cushina cuminda pa por yuda cubri nan gastonan, pa por cumpli cu e criteria di certificacion.
“Trampolin pa Trabou no ta ricibi hopi subsidio pa nan por haci nan trabou, dus nan echt mester di tur e ayudo cu nan por haya,” Weltings a agrega.
Pa mas informacion y con pa haci donacion por bishita nan pagina di Facebook ‘Down the Road Aruba’ of nan website downtheroadaruba.com
