(AP) – Guianan nobo di e gobierno federal a causa un cantidad grandi di reglanan nobo pa cu e uso di tapaboca den henter e nacion riba diaranson mirando cu ciudad-, estado-, scol- y negoshinan ta cuminsa un careda pa trece back mandatonan y otronan ta pusha contra e guianan den un tempo unda cu e Mericano nan ta agota y confundi pa motibo di medidanan cu ta keda cambia cada biaha.

Nevada y Kansas City, Missouri, ta entre algun di e luganan unda cu e movida di bolbe impone e uso di tapaboca den paden di edificionan despues di e anuncio riba diamars di Centers for Disease Control and Prevention a tuma luga. Pero Gobernadornan na Pennsylvania y South Carolina a bisa cu nan no lo bolbe back na mandatonan estricto tocante uso di tapaboca.

Den algun area di Atlanta, Jamie Reinhold a bisa cu e ta considerando saca su yiunan for di scol si e districto mantene e regla di uso di tapaboca estricto nobo. E senora di 52 aña di edad a bisa cu e CDC su guianan nobo lo hiba e pais atras y dana e confiansa cu tin den e vacunanan.

“Si bo ta kere den e uso di tapaboca, dal bay, pero no purba di bisami kiko pa mi haci pa mi yiu su salud y su sistema inmunologico,” Reinhold a declara. “E ta mi yiu, y e ta mi decision.”

Districtonan di algun scol ta purbando di navega den e conseho recien, cual ta recomenda e uso di tapaboca pa tur studiante, empleadonan, juffrouwnan y bishitante.

Tin un cantidad di estadonan Republicano cu ya a haci e ordennan aki illegal pa scolnan. Arkansas su lidernan GOP tabata poniendo den balans si revisa un ley poni den april cual ta prohibi mandatonan pa cu uso di tapaboca, por lo menos na scolnan.

Mientras cu Ford Motor Co, a bisa cu e lo bolbe pone protocol di uso di tapaboca pa tur empleado y bishitante na su facilidadnan di Missouri y Florida. E dos estadonan ta dentro di e estadonan unda cu e golpinan tabata mas fuerte den Merca. Y aworaki tin un averahe di mas di 60,000 caso nobo pa dia, motiva pa e variante mas contagioso delta, den populacionnan unda cu e cantidad di personanan vacuna ta hopi abao.

Na otro luganan, Google a pospone un regreso na oficina planea pa 1 di september pa mas di e 130,000 empleadonan te cu mita di october, despues di un movida similar haci pa Apple, unda cu tambe a pospone e plannan di regreso na oficina.

E gigante den tecnologia di California a bisa riba diaranson cu nan tambe eventualmente lo rekeri tur empleado pa ricibi nan vacuna, un mandato cu President Joe Biden a bisa cu e tambe ta poniendo den balans e mandato aki pa empleadonan federal.

Otro lidernan di gobierno a bisa cu nan lo warda pa reinstitui reglanan pa cu e uso di tapaboca pa awo.

Pennsylvania su Gobernador Tom Wolf a bisa cu e no ta considerando impone uso di tapaboca den scolnan of den e estado, argumentando cu ordennan aki tabata necesario ora cu no tabatin vacuna.

“Hende tin e habilidad ta tuma e decision di ricibi nan vacuna,” e democrata a bisa den un entrevista na radio di Pittsburgh. “si nan dicidi di haci esaki, esey ta e proteccion.”

E guianan nobo di CDC ta aplica na luganan unda cu tin por lo menos 50 caso nobo pa cada 100,000 hende den e ultimo siman, cual ta casi 60% di cierto ciudadnan na Merca, oficialnan federal a bisa. Casi henter e parti Sur di e pais ta cai bao di e guianan aki, pero mayoria di e comunidadnan den e parti noord di e pais, cu excepcion di area nan unda cu tin metro manera New York City y Boston, ta excepcion te cu awo segun CDC su controlado di COVID.

E division ariba di e uso di tapaboca aki ta pone e potencial den e trabao cu mester wordo haci pa cu e regulacion den otro estadonan y ciudadnan.

Na Florida su Miami-Dade County, Mayor Daniella Levine Cava a impone e uso di tapaboca den edificio riba diaranson na cierto faciliddanan.

E anuncio di e democrata, cual no ta aplica pa negoshinan ni restaurantnan, ta bin despues cu e Gobernador republicano di Florida Ron DeSantis a firma un ley nobo den mei unda cu ta duna e estado e poder di haci invalido e medidanan local pa cu e pandemia, incluyendo mandatonan pa e uso di tapaboca y limitacion riba e operacion di algun negoshi.

“Nos tur a yega hopi leu. Nos tur a sacrifica demasiado den e aña pasa aki, casi un aña y mei awo. Nos no por bira nos lomba,” Levine Cava a bisa.

Den Missouri, e St. Louis County Council a vota riba diamars pa bolbe back na e mandatonan pa uso di tapaboca, un dia despues cu el a bira e prome cu a reinstitui e mandatonan aki.

Pero e Democratic County Executive Sam Page a insisti riba diaranson pa e mandatonan aki permanece den efecto.

Na otro banda di e estado, Kansas City Mayor Quinton Lucas, un democtra,a a reinstitui un mandato pa uso di tapaboca paden pa Missouri su ciudad mas grandi.

Fiscal di e estado General Eric Schmitt, ken ta candidato pa senado di Merca como republicano, a demanda pa blokia e area di St. Louis su andato, y a hura di haci mescos pa Kansas City bisando riba e red social Twitter cu e mandatonan ta pa “control y politica, y no ciencia.”

E CDC su guia nan actualisa a bini pa motibo di datonan nobo cu ta sugeri hendenan vacuna por pasa e virus den casonan no comun, Rochelle Walensky, e agencia su director a bisa riba diaranson.

Pero el a enfoca cu e vacunanan ta haciendo nan trabao, cual ta di preveni nivelnan halto di hospitalisacion y morto. Personanan cu te ainda no ta vacuna, Walensky a nota, ta e mayoria di e casonan nobo. Dos tercera parti di e populacion elegibel pa ricibi e vacuna na Merca a ricibi por lo menos un dosis.

“Misa cu esaki no ta e mensahe cu Merca kier scucha,” Walensky a bisa CNN. “Cu variantenan anterior, ora cu hendenan tabata pasando den e casonan aki, nos no a mira e capacidad cu nan tabatin di por sigui plama e virus, pero cu e variante delta, nos ta mira cu nan por sigui pasa e virus aki na otro personanan.”