Guera na Ucrania lo causa cu prijs di pan y pasta lo aumenta

(NLTimes) – Prijs di hariña lo sigui aumenta pa causa di e guera cu ta tumando luga na Ucrania.

E invasion Ruso a causa cu e exportacion di productonan pa produci hariña di e pais na Rusia a para. Cunukeronan di Ucrania no tin e manera di sigui mantene nan plantashi, cual tambe lo contribui na escasez den termino largo, y pa e motibo aki prijsnan halto tambe. Esaki ta nifica cu consumidornan lo mester paga mas pa productonan manera pan, pizza, pasta y otro productonan cu ta haci uso di e ingredientenan similar.

Ucrania y Rusia ta responsabel pa casi un kwart di e exportacion global. E pelea cu ta keda escala a causa cu varios waf a cera, entre otro, cual a causa cu e transport a para y algun logistica a sufri daño. E guera tambe ta menasa henter e aña aki su plantashi na Ucrania mirando cu cunukeronan probablemente lo mester uni na e lucha. E escasez ta hopi probabel di sigui te den e proximo temporada, y posiblemente te hasta mas.

E prijs di hariña a aumenta cu mas o menos 7 porciento, y ta premira cu esaki lo sigui aumenta, mientras cu e prijs ya caba a aumenta cu 41 porciento siman pasa. Esaki ta e aumento semanal mas grandi cu a yega di mira.

Prijs di e productonan aki ta na nan nivel mas halto desde e crisis di cuminda den aña 2009. Segun Nacionnan Uni, prijs di cuinda ya caba ta na un nivel asina halto cu e ta kibrando record, y te ainda lo sigui aumenta. Esaki lo empeora e problemanan di importacion, cual lo causa hopi mas sufrimento pa causa di hamber.

E guera lo haci tur cos mas caro. Den adicion na hariña, prijs pa energia, metal y otro materialnan tambe ta aumentando. E aumento den prijsnan ta sigui pone presion riba e inflacion cu ta mirando riba economia mundial.

Mientrastanto, varios gobierno ta tumando medida pa sigura suministro domestico. Hungria por ehempel, a prohibi exportacion di nan producto. Argentina a prohibi exportacion di turkey, y Indonesia tambe ta tumando decisionnan pa aumenta e control riba produccionnan local. Moldova temporalmente a prohibi exportacion di hariña, maisena y sucu.

Merca y Cana ta hopi probabel di cuminsa cu plantashinan nobo mirando e aumento den prijsnan. E problema ta cu e extremo cu tempo por ta na e paisnan aki, manera escasez di awa of demasiado awasero, ta haci cu no por cosecha debidamente den e regionnan aki.