E guera di documento a cuminsa. Loke exigi transparencia como ciudadano nunca por a logra, ta tumando luga boluntariamente via e politiconan mes. Tiramento di lodo so e ta? Nos no ta pensa asina. Nos ta kere cu mester evalua cada documento presenta riba su merito. Ki sorto di documento e ta? Kico e ta proba? Tin un delito envolvi den e asunto? Si ta asina, kico ta bay haci cu ne? Hopi di e preguntanan aki ta bin dilanti ora nos tira un bista riba e documentonan cu e lider di e partido POR a pone riba mesa awor. Nan ta relaciona cu e caso cu di basta tempo caba ta haya hopi atencion den e medionan di comunicacion cu no ta apoya e gobierno actual ciegamente.
Centro di atencion ta e aparente organisacion lanta cu e meta pa comete crimen, di e ministro encarga cu Infrastructura. Den e dianan desde e invasion na cas di su colega, continuamente nos ta tende e comentario: “Ami no ta comprende un cos. Pakico Paul Croes? E otro aki no solamente ta su brother in crime pa loke ta permiso; e tin otro pica mortal ta comete den bendemento di tereno. Ki dia OM ta bay haci algo cu esey?” Y den e editorial aki tambe mas di un biaha nos a comenta riba e negoshi di tereno cu ta sigui te awe manera nada no a pasa. Y no solamente mester investiga e asunto di otorga y despues bende tereno, cu a haya den opcion, pa sumanan miyonario, pero mester investiga cu despues di bay riba cuenta di un tal persona, unda e placa aki ta bay?
Pasobra ta inimaginabel cu ta haci e sorto di dealnan aki, anto e beneficiado ta solamente e persona aki? Nan por ta stim’e den su partido, pero tanto asina cu e por enrikece su mes y keda cu tur cos? ‘A otro perro con ese hueso.’ No ta pornada nos, y otronan, ta keda mustra riba necesidad di un ley di financiamento di partido politico, cu ta supervisa tambe henter e structura organisativo cu nan tin den forma di fundacion cu ta handle placa pa nan. Tambe nos ta bolbe mustra riba e delito, ya documenta na varios ocasion, di e ‘contribucion social’ cu e ministro di Infrastructura ta exigi di e beneficiadonan cu a haya tereno comercial cu nan a bira bende despues. Bo no por exigi placa pa emiti propiedad publico, ni pa meta caritativo; esey yama corupcion y ta castigabel! Pero tambe nos ta mira, specialmente di e partido den gobierno, cu nan no kier percura pa control, pasobra e no ta cumbini nan, no den tempo di eleccion, nunca.
Simplemente aki a lanta tapa di un di e posnan di corupcion mas grandi cu e comunidad aki a yega di mira. Si nos prome ministro kier gaba cu su gabinete a kibra mas record cu tur otro gobierno den nos historia, no desde 1986, sino desde 1954, nos no por haci nada mas cu reconoce cu e biaha aki si nos ta completamente di acuerdo cu ne. Solamente cu e lo no ta di acuerdo cu e recordnan cu nos kier menciona. Claro cu tin di nan cu e no por nenga. Cu nos tin e dudoso honor cu un ministro di nos pais ta ser lanta di su cama cu un invasion combina di cuerpo uniforma di Aruba y Hulanda, pa prome biaha di e forma aki den henter Reino. Nos ta corda bon cla e caranan di desapunto y, esey nos ta spera, algo di berguensa tambe, durante nan video graba pa evita un confrontacion directo cu prensa. Ta p’esey e demostracion di hubilo di fin di siman cu a pasa, unda a duna impresion cu nan a gana lotto pa hinca esaki den campaña, a cay asina malo cerca tanto hende.
Naturalmente nos por spera cu e otro banda, di gobierno, tambe lo cuminsa saca informacion, entre otro tocante e ex ministro disidente cu a lanta su mes partido. Pero pa esaki ta conta mescos. Nos ta evalua cada documento riba su balor specifico. Asina ta, laga nan bin. En todo caso, cu esaki e campaña electoral a cuminsa drenta den un fase nobo, unda por spera revelacion nobo tocante mal gobernacion tur dia. Ki efecto esaki lo tin riba eleccion finalmente, no ta cla ainda. No semper ta echo ta dicidi con hende ta pensa y actua. Hende gusta kere esun cu nan kier kere.
Pero di otro banda, nos tur a gana cu e pruebanan di mal gobernacion a cuminsa sali. Sikiera di e manera aki nos a cuminsa haya algo di transparencia. Despues di casi ocho aña di hinca nos den un abismo financiero nunca bisto, mas documento sali, miho. No tin miho manera pa convence e ciudadano cu no ta cuestion di djis laga e proximo gobierno tuma over; tin hopi cos di drecha.
