Mientras a bira inevitabel pa gobierno y su subalternonan den parlamento cumpli cu ley y percura pa Gobernador por cumpli cu ley tambe, tin señal visibel cu nan no ta di acuerdo. Ayera nos por a presencia un acto solemne den parlamento, cu en general a bay manera mester ta. Nos a pone un banda caba e hecho insolito cu a laga aña 2016 caba sin cu e acto solemne a tuma luga. Ban supone cu simplemente un persona den e organisacion a ‘screw up’. Sin embargo, ora na un ocasion asina importante, dos tercera parti di e gabinete no ta haci acto di presencia, no por ta casualidad. Y ni cu nan tabatin otro asunto pa atende, pa e evento aki bo ta pone bo agenda ‘on hold’. Ni cu Obama o Trump bin di bishita di cortesia, na modo di papia.
E demostracion silencioso aki di parti di e partido den gobierno ta haci nos corda algun aña pasa, tempo cu na inauguracion di aña parlamentario henter e fraccion gubernamental a bin bisti na preto. Esaki como señal di luto y di desacuerdo cu e hecho cu riba insistencia di Hulanda, a añadi algun aspecto na e discurso di Gobernador, cu cual e gabinete no tabata di acuerdo. Entre otro e Gobernador a anuncia cortamento drastico den gastonan di personal, na un ritmo di 5% pa aña. Algo cu despues no a keda cumpli tampoco.
Den cierto sentido gobierno tabatin rason, pasobra e discurso di Gobernador ta den su calidad di hefe di gobierno di Aruba y normalmente ta gobierno ta traha e discurso. E pregunta e ora ta pakico nan a baha cabes pa e Hulandesnan anto. Nos no por ta mucho encanta cu e actitud yoron ‘after the fact’ aki. Ayera anto, un ripiticion: seis ministro ausente den obvio desafio di e reglanan ‘no skirbi’ cu si bo ta considera bo mes un persona culto y civilisa, y bo ta consciente cu bo actonan eroneo ta refleha riba e pueblo cu bo ta representa, anto bo ta laga sentimento un banda y bo ta presenta pa e ocasion. Corda cu como ministro bo no ta representa solamente bo votadonan, ni mucho menos solamente e man yen di fanatico cu ta yama tur merdia na radio, pero bo ta representa nos tur.
Y como muestra cu nos si ta comprende e importancia di e forma respetuoso cu como ministro bo mester ricibi tambe en cambio di otronan, den e medio aki nos no ta ofende ningun hende, mucho menos mandatario di e pais aki, pero esey no ta libra ningun di bira blanco di critica acerta, pero no dirigi riba su persona, sino riba e asunto. Asina ta, cumpli pa nos por cumpli cu boso.
Tur esaki naturalmente ta haci cu e pregunta duna na inicio di e editorial aki mester un contesta: esaki ta e final di e hostilidadnan contra Gobernador, o lamentablemente nos ta para dilanti di un periodo negativo unda cada desacuerdo chikito no ta haya debido atencion discreto, pero ta uza esaki como arma publicitario manera den e sucesonan na 2014? No ta cuestion solamente cu de por si e Gobernador tin derecho di ser trata cu e debido respet; e asunto ta tambe cu den e trabao diario di comunicacion entre despacho di e Gobernador y gobierno, cual ta encera un cantidad di documento cu mester keda firma pa nan haya vigencia legal, mester tin un ambiente di colaboracion positivo. Esaki pa no tranca trabao, perhudicando e pais y den cierto caso, hasta ciudadano individual.
Den e simannan cu a pasa nos a tende di varios comentario y rumor cu e pleito no a caba, pero awor numa el a cuminsa. Manera semper, nos a trata tal comentario como no sustenta pa hecho y por lo tanto no digno di publica. E actitud corecto ta di no reacciona tanten nos no ta mira hecho palpable. Awor nos a mira nan y no ta laga e ocasion pasa sin bisa nada. Y e motibo pa tuma e asunto aki na serio ta pasobra nos ta keda mira un actitud negativo y un interpretacion eroneo di e relacionnan den Reino na nan fabor, cu simplemente no ta conveni nos como ciudadano Hulandes, alabes Arubiano. No ta nos como ciudadano tin un problema cu Madre Patria, ta nan tin un problema pasobra nan no kier un nivel superior di control y supervision den e constelacion cu nos ta biba aden.
Pa minimalisa e supervision ey, ta uza tur medio, incluyendo esun famoso di acusa Hulanda di ‘neo-colonialismo’ y exigi cu ta bin un instancia hudicial pa hiba keho aya, ampliando asina e arsenal di arma den e lucha pa ‘autonomia’. Autonomia di ken, pa ken? Ademas cu e palabra ‘autonomia’ mes ta encera cu e tin un limite; esey ta unda e nivel superior di Reino ta cuminsa.
Claro cu mayoria di hende por comprende cu e politico di turno no gusta esey, pero pa pueblo si ta bon. Imagina cu Hulanda no a haci nada na 2014, unda nos lo ta awe?
