Guatemala y Merca a firma un acuerdo di cooperacion pa combati e trafico di droga y di migrantenan dialuna pasa, meymey di un exodo di Guatemalteconan pa e pais, cu a bira pio den ultimo lunanan.
E acuerdo a ser firma pa presidente di Guatemala Jimmy Morales, y secretario interino di Siguridad Nacional Mericano, Kevin McAleenan, kende ta na e pais den un bishita sorpresa.
E halto funcionario Mericano a yega Guatemala den oranan di atardi y a dirigi ta e Palacio Nacional di Cultura, na e centro historico di e capital, pa un reunion breve cu Morales.
Minister di Gobernacion (Interior) Enrique Degenhart, a bisa periodistanan cu e convenio lo aumenta e capacidad di e forsa Guatemalteco pa ataca e structuranan criminal cu ta trafica migrantenan.
Degenhart a declara cu e acuerdo ta establece e envio di investigadonan pa enfrenta e problema ey, como tambe combati narcotrafico, trafico di arma di candela y labamento di placa.
Ta espera cu e trabou conhunto lo permiti pa haci ‘mas eficiente y efectivo e investigacionnan contra e crimen organisa’, e minister a bisa.
Fuentenan cercano na e tema, extra oficialmente a indica cu McAleenan lo reuni diamars cu e ministernan di Interior di e Triangulo Nort di Centro America, forma pa Guatemala, El Salvador, y Honduras, pa analisa e migracion iregular desde e paisnan ey na Merca.
E nort di Centro America tabata origen desde october di un ola di caravana di migrantenan, cu miles di persona cu tabata busca pa yega Merca y scapa for di e violencia y pobresa na nan pais.
