Gobierno di Guatemala diasabra ultimo a anuncia cu di 340 municipio cu e pais tin, 165 di nan ta mantene un nivel di alerta maximo pa Covid-19, 36 menos cu 15 dia pasa, di acuerdo cu un ultimo actualisacion di datonan di sistema cu ta regula actividadnan economico y convivencia di e pais.
165 municipio na color cora, nivel di alerta maximo, ta coresponde pa 48.5% di e pais, di acuerdo cu Ministerio di Salud Guatemalteco.
Actualisacion di e cartera sanitario di diasabra a señala tambe 101 municipio cu ta cu alerta oraño, 74 cu alerta geel y ningun a yega na e denomina ‘normal nobo’ cu gobierno a implementa desde 27 di juli ultimo.
Segun informacion cu autoridadnan a duna di conoce, 36 municipio a sali for di alerta cora, mientras cu alerta oraño a aumenta di 93 pa 101. Di loke ta trata alerta geel a pasa di 46 pa 74 municipio.
E nivelnan di alerta pa colonan a wordo incorpora pa e Gobierno di presidente Guatemalteco, Alejandro Giammatei, 27 di juli y ta regula e actividadnan economico y di convivencia segun e number di contagio pa municipio, cu ta actualisa cada dos siman.
E sistema a wordo critica pa varios experto cu ta argumenta cu e colornan cora y oraño ta practicamente mesun cos, pero e pais no a cuminsa su reapertura oficial desde e 27 di juli.
E medida a representa e final di aislamento cu a cuminsa pa coronavirus 15 di maart ultimo y tambe e reapertura di restaurantnan, misanan, centro comercial y transporte publico.
Diasabra ultimo Guatemala a suma 3.105 morto pa Covid-19 y 85.152 caso positivo despues di conta 29 morto y 809 contagio den ultimo 24 ora.
