(EFE) – Aña pasa un proyecto social denomina Biosferagt opera pa habitantenan di un comunidad di Guatemala, a permiti recupera 300 ton di desperdicio na e riu Las Vacas, considera como e principal riool di e capital di e pais centro Americano, na unda tres miyon persona ta biba.
“E proyecto aki ta surgi di e necesidad di haci e riu limpi, pasobra e contaminacion ta bay te e costanan di Honduras y ta un problema cu a surpasa e fronteranan” Mario Zea, director operativo di e organisacion no gubernamental Biosferagt a bisa.
Awor na 2023, e proyecto social ta busca aliadonan nobo y ta bay implementa dos ‘biobarda’ na e riu Las Vacas, cu ta ubica na 15 kilometer di Guatemala, cu e obhetivo di duplica e cantidad di desperdicio recupera. Na e momentonan aki tin 1 biobarda so instala.
Un biobarda ta un otro iniciativa ambiental cu ta traha manera un barera; e ta evita cu desperdicionan solido lo drenta den e riu y ta wordo construi cu material di reciclahe.
Zea ta describi e proyecto como “un soño cu a nace ocho aña pasa” y cu danki na aliansa cu socionan como e firma Coca-Cola tabata posibel pa cuminsa saca e sushi di e riu Las Vacas for di 2 di februari di 2022.
Durante e di dos aña di operacion, ta espera cu e proyecto por wordo instala e otro dos biobarda, cu apoyo di e organisacion Hulandes The Ocean Cleanup, cu tin 50 meter di hanchura y ocho meter di haltura pa asina por contene por lo menos 600 ton di desperdicio di e mas di 8.500 riool cu residencia, fabrica y hospital a benta den e riu aki pa aña.
E desperdicionan ta wordo haya pa Biosferagt y despues nan ta wordo procesa pa mas di 25 trahado, cu ta pertenece na e comunidad di San Antonio Las Flores na municipio di Chinautla, departamento di Guatemala.
