Cu ayudo di un tecnica di cartografia aereo, un grupo di investigado a descubri cas, edificio, obra di defensa y piramid Maya den e selvanan cera di departamento di Peten, na Guatemala. Esaki ta mustra cu tabatin miyones di hende mas bibando ey cu loke tabata pensa.

E descubrimento, cu ta inclui camponan agricola di tamaño industrial y canalnan di irigacion, a wordo anuncia diahuebs pasa pa un aliansa di arkeologo Mericano, Europeo y Guatemalteco cu a traha conhuntamente cu e Fundacion Patrimonio Cultural y Natural Maya di Guatemala.

E estudio ta calcula cu aproximadamente 10 miyon persona por tabata biba den e teranan plano Maya aki, loke ta significa cu posiblemente tabata necesario produci alimento den forma masivo.

‘Esaki ta dos of tres biaha mas (habitante) di loke tabata bisa cu tabatin,’ Marcello A. Canuto, profesor di antropologia na Universidad Tulane, na New Orleans, ta bisa.

E investigadonan a uza un tecnica di cartografia conoci como Lidar (Laser Imaging Detection and Ranging), cual ta haci cu un rayo laser di emision pulsa ta keda refleha na tera, loke ta permiti lesa e contornonan di e tereno scondi den e foliahe cera.

E imagennan a revela cu e Mayanan a altera e paisahe di un forma mucho mas amplio cu loke tabata pensa, ya cu den algun area nan tabata cultiva 95% di e tera disponibel.

“Nan agricultura ta hopi mas intensivo y por lo tanto sostenibel di loke nos tabata pensa, y nan tabata cultiva cada duim di e tera”, Francisco Estrada Belli, profesor adhunto di investigacion na Tulane, ta bisa y ta mustra cu e Mayanan antiguo tabata haci drenahe den areanan moeras cu desde e tempo ey no tabata considera digno di ser usa pa agricultura.

E cerca nan amplio di defensa,  sistemanan di coba y muraya, y e canalnan di irigacion, ta permiti supone cu e forsa laboral tabata altamente organisa.

“Estado tabata involucra aki, pasobra nos ta mira e cobamento di canalnan amplio cu ta duna un direccion nobo na e fluhonan natural di awa”, Thomas Garrison, profesor adhunto di antropologia na Universidad Ithaca di New York, ta conta.

E 2.100 kilometro cuadra di cartografia realisa ta amplia enormemente e area cu tabata pensa cu e Mayanan tabata ocupa intensivamente, unda nan cultura a florece aproximadamente di 1.000 A.C. te 900 D.C. Nan descendientenan ainda ta biba den e region.

Cu e cartografia a descubri como 60.000 structura individual, incluyendo cuatro centro ceremonial Maya cu plasa y piramid.

Garrison a mustra cu, diferente na otro cultura antiguo di cual e campo, caminda y daknan a wordo destrui pa e siguiente generacionnan di agricultor, e selva a crece riba e campo y structuranan bandona di e Mayanan, scondiendo y preservando esakinan.