Aunke tur analista ta di acuerdo cu e participacion lo tabata minimo, 7,5 miyon Guatemalteco tabata convoca pa bay vota diadomingo ultimo, di acuerdo cu un mandato constitucional, pa dicidi si ta laga den man di Corte Internacional di Husticia e delimitacion definitivo di e frontera cu Belize.

E conflicto ta origina leu den historia, te na e epoca colonial. Di acuerdo cu e historia oficial, entre 1783 y 1786 e Corona Spaño concede licencia na Inglatera pa extrae ‘palo de tinte’ (verfhout), den norte di loke awe ta Belize. Tabata e inicio di e problemanan teritorial. Guatemala a separa di Spaña na 1821 mientras cu e colonia Britanico tabata sigui expande su teritorio, y na 1851 Guatemala mes a cede un area entre e riunan Sibun y Sarstun, a cambio di un caminda, cu lo a duna Guatemala un salida pa costa di Caribe. Noa construi ni un metro y na 1863 Gran Britania a compromete na paga Guatemala 50.000 pound sterling pa e teritorio ocupa. Nunca nan a paga.

Actualmente Belize ta ocupa un area di 22.966 kilometro cuadra. E pais a bira independiente na 1981. Na 1991 Guatemala a reconoce e gobierno y e poblacion, pero no e teritorio. Guatemala no ta reclama e totalidad di e teritorio, aunke ta bisa si cu e tin derecho riba e 12.100 kilometro cuadra entre e riunan Sibun y Sarstun pa cual Londres nunca a paga.

En bista di e imposibilidad di logra un acuerdo bilateral, na 2000 e Organisacion di Estadonan Americano (OEA) a inicia un intermediacion. Na 2008, Belize y Guatemala a dicidi di somete e conflicto na corte internacional di Husticia, pa establece definitivamente e fronteranan entre ambos pais. Riba esey e Guatemalteconan a vota ayera.

Pero pa e veredicto di corte Internacional tin validez, e ciudadanonan di Belize tambe mester manifesta nan opinion, y consciente di e posibilidad cu nan por perde parti di nan teritorio, na Belize no ta parce di ta existi ningun pura pa tene referendum.
Di tur manera, sin fecha na Belize pa un referendum, y na Guatemala en todo caso un decision na fabor di trata e caso den corte Internacional, e problema ta leu di keda resolvi.

(fuente: ElPais)