Cinco leon y diesdos tiger rescata di circonan na Guatemala a yega e siman aki na Sur Africa, unda nan lo biba den santuario.
“Tabata un biahe largo cu un ruta complica pa motibo di diverso restriccion relaciona cu siguridad pa vuelo y transito di e animalnan, pero nos t’ey”, segun e mision di rescate di e organisacion Animal Defenders International, ADI.
E proximo parada lo ta e santuario di bida salvahe di ADI, cu a impulsa e rescate di e animalnan despues cu gobierno di Guatemala a implementa un prohibicion di uzo di animalnan den circo.
“Un gradicimento special na tur cu a haci donacion durante e biahe y a duna nos animo. Nos a cambia e forma con ta trata animalnan na Guatemala, pa semper”, e organisacion a afirma.
A transporta e cinco leon y 12 tiger via aereo na Sur Africa, unda cu un logistica special a baha nan di e avion cu tabata transporta nan. Durante ocho luna, e team di ADI tabata na Guatemala y a traha pa cumpli e prohibicion di uzo di animal den circo.
Na aña 2017 a aproba e legislacion prohibiendo uzo di animal den circo na Guatemala, y esaki a drenta na vigor na april 2018, pa cual motibo a rescata e animalnan. Durante e biahe na Sur Africa, un veterinario a compaña e animalnan pa tene nan den observacion y duna medicina na e tigernan Bimbi, Lupe y Sombra. Esaki pa preveni convulsion cu e tigernan aki ta sufri.
